პირველი ლიგის ლიდერმა ‘გორმა’ რეგულარულ სეზონში პირველობა ვადამდე გაინაღდა. შიდა ქართლელებმა 15-ივე ჩატარებულ შეხვედრაში იმარჯვეს, 72 ქულას მოუყარეს თავი და მდევართათვის მიუწვდომელნი შეიქნენ. ‘გორს’ მარაგში ‘წყალტუბოს ‘დინოზავრთან’ გადადებული შეხვედრაც რჩება გასამართი. ‘წიქარამ’ და ‘ვეფხვებმა’ 56-56 ქულა დააგროვეს, თუმცა უკეთესმა პირისპირ ბალანსმა ცხრილის მე-2 საფეხურზე გარე კახელები განათავსა. ‘დინოზავრმა’ 49 ქულით მოწინავე კვარტეტში პოზიცია გაიმყარა. პლეი ოფის 2 დარჩენილ ადგილს ‘რუსთავი’ და ‘ლოკომოტივი’ იკავებს.

‘რუსთავმა’ 39 ქულა დააგროვა და ‘ლოკომოტივს’ 1 ქულით გადაასწრო. ‘მათე’ 31 ქულით მე-7 ადგილზე რჩება და ‘რუსთავთან’ გადადებული გასვლითი შეხვედრის გამართვაც მოუწევს. ‘ფოთი’ 20 ქულით მე-8 პოზიციას ინარჩუნებს და ბოლოსწინა, პლეი აუტის ადგილზე მყოფ ‘არწივებს’ კვლავინდებურად 7 ქულით უსწრებს. 4 ქულის მქონე აუტსაიდერ ‘აკადემია-ლაშარს’ კი ბოლო ადგილისაგან თავის დასაღწევად (პირდაპირ გავარდნისგან) პირველობის ორივე დარჩენილი შეხვედრის მოგება მართებს და თან პარალელურად ‘არწივებმა’ ორივე მატჩი მარცხით უნდა დაასრულოს.

ოზურგეთის ცენტრალურ სტადიონზე, დარჩენაზე მებრძოლმა ‘არწივებმა’ ლიდერ ‘გორს’ ჯეროვანი წინააღმდცეგობა ვერ გაუწია. შიდა ქართლელები საგრძნობ უპირატესობას ფლობდნენ და გურულებს 7 უპასუხო ლელო დაუდეს. გორელთა კვაჭმა ლუკა კეკელიამ მატჩის დებიუტში „დუბლი“ შეასრულა. წყვილი ლელოს გატანა სტუმართა ფრთა დავით მთვარაძემაც მოახერხა, ვინაც 6 გარდასახვაც გამოიყენა. ‘გორმა’ შეხვედრა „მშრალი“ ანგარიშითა და პრემიალური ქულით მოიგო - 47:0.

„ხარები არენაზე“, ‘რუსთავისა’ და ‘ფოთის’ შეხვედრა დრამატული და კარგი საცქერი გამოდგა. რუსთაველები მარბიელი კაპიტნის ზვიად ღამბარაშვილის გარდასახული ლელოთი დაწინაურდნენ, რის შემდგომ კარგა ხნის მანძილზე უპირატესობას კოლხები ფლობდნენ. ფოთელთა ფრთა გიორგი ზუბიაშვილმა „დუბლი“ შეასრულა, ხოლო სტუმართა სამხრეთ აფრიკელმა ფულბეკმა ბლეიქ დიდერიქსმა, ზუსტ გარდასახვას 4 გატანილი ჯარიმაც დაურთო.

მატჩის დამთავრებამდე 15 წუთით ადრე კოლხები ანგარიშში უპირატესობას ინარჩუნებდნენ, თუმცა დასკვნით მონაკვეთში ფოთელებს დაღლა დაეტყოთ, რამაც ქვემო ქართლელებს შეხვედრის თავის სასარგებლოდ შემოტრიალების შესაძლებლობა მისცა. დარჩენილ დროში ‘რუსთავმა’ 4 უპასუხო ლელოს (ფრთა ფრიდონ კილაძე, 41 წლის ბორჯღალოსანი ბიძინა სამხარაძე, შუამარბი საბა ლიპარტელიანი და ბურჯი ვანო ნოზაძე) გატანა მოახერხა და თან მატჩი პრემიალური ქულით მოიგო - 35:24.

„ლოკომოტივის ბაზამ“, ‘წიქარა’-‘ლოკომოტივის’ დედაქალაქურ დერბის უმასპინძლა. „რკინიგზელები“ აქცენტს სრულად სტატიკაზე აკეთებდნენ და 3 ძალისმიერი ლელოც გაიტანეს. ‘წიქარას’ შეტევები კი გაცილებით მრავალფეროვანი გახლდათ. კომბინაციურ სტილში ‘წიქარამ’ 5 ლელო გაიტანა. ფრთა კლავდიუს ხუციშვილმა „დუბლი“ შეასრულა, ხოლო მგეზავმა გიორგი ასათიანმა 5-ივე გარდასახვა გამოიყენა და 4 ჯარიმაც უნაკლოდ შეასრულა. ‘ლოკომოტივი’ ბოლომდე იბრძოდა და მარქაფადან ჩართული ბურჯის ნიკა ცოფურაშვილის დადებული ლელოთი მეტოქეს პრემიალური ქულა არ ააღებინა. ‘წიქარამ’ მატჩი 47:19 მოიგო, თუმცა ცხრილში სასურველ მე-2 ადგილს გამოეთხოვა.

ჭიათურის ცენტრალურ სტადიონზე, ‘მათესა’ და ‘ვეფხვების’ შეხვედრის დებიუტში ზემო იმერლები კვაჭ მამია მანდარიას გარდასახული ლელოთი დაწინაურდნენ, რასაც გარე კახელთა ფრთის სულიკო მუჩიაშვილის საპასუხო ლელო მოჰყვა. შემდგომში შეხვედრას ‘ვეფხვები’ სრულად აკონტროლებდა და მთლიანობაში მასპინძლებზე 3-ით მეტი, 6 ლელო გაიტანა. გარე კახელთა შუამარბმა რატი პაპაშვილმა „დუბლი“ გაიფორმა. მატჩის ბოლო წუთზე კი მხტომელი კაპიტნის ზაურ შაქარაშვილის დადებულმა ლელომ, ‘ვეფხვებს’ შეხვედრა პრემიალური ქულით მოაგებინა - 40:19.

„რაგბი პლატოზე“, ‘აკადემიამ’ ‘დინოზავრს’ ბრძოლა მხოლოდ მატჩის დებიუტში გაუმართა და ფრთა ნიკოლოზ ბერბიჭაშვილის გარდაუსახავი ლელოთი ანგარიშში ჩამორჩენა 2 ქულამდე შეამცირა. შემდგომში იმერლებმა უპირატესობა ფრთა იაგო ხაბულიანის გატანილი ლელოთი გაიმყარეს და შეხვედრის მიწურულამდე მხატვრებს კიდევ 5 უპასუხო ლელო დაუდეს. ‘დინოზავრის’ გამოცდილმა მღლეტელმა ბადრი დანგაძემ „დუბლი“ შეასრულა. დანგაძე მატჩის პირველი და ბოლო ლელოს ავტორიც გამოდგა. ზაზა ჩირგაძის ბიჭებმა შეხვედრა დაგეგმილი პრემიალური ქულით მოიგეს - 43:5.

RUGBY.GE