თბილისის ‘ლელომ’ დედაქალაქურ დერბიში ‘არმია’ 17:10 დაამარცხა და „სარბიელის სინი“ კი მოიპოვა, მაგრამ თავად ბონუს-ქულა ვერ აიღო, მეტოქეს ნუგეშის ქულა გაატანა და ფლეი ოფს მიღმა დარჩა.

crocobet დიდი 10-ის მე-17 ტურში, დიდ დიღმელებმა მხოლოდ მეექვსე გამარჯვება იზეიმეს (1 ფრე, 10 მარცხი), 33 ქულა მოაგროვეს და ექვსეულში შესვლის შანსი დაკარგეს. ეს მას შემდეგ გაირკვა, რაც ნუგეშის ქულა თავის მატჩში რუსთავის ‘ხარებმაც’ აიღო და ‘არმიას’ მსგავსად 39 ქულა მოაგროვა. შედეგად, დარჩენილ ერთ ტურში 6 ქულის აღმოფხვრა შეუძლებელია და მოწინავე ექვსეულშიც სტუმარ-მასპინძელი და ბადეღა დარჩა გასარკვევი.

ავჭალაში, ქარში, ხელოვნურ საფარიან მოედანზე, ‘არმიამ’ დებიუტში ჯარიმა გააცუდა, მაგრამ მალევე კარში დარტყმას ლელოზე თამაში არჩია, დერეფნიდან მძლავრი მოლით შეუტია და ირაკლი ქვათაძემ ლელო გაიტანა. ‘ლელომ’ მე-17 წუთზე უპასუხა. შალვა აფციაურმა თავისი ნახევრიდან კარგი შეტევა წამოიწყო, მიყოლამაც არ დააგვიანა და იოანე მეტრეველმა წონასწორობა აღადგინა, პეტრე ხუციშვილმა კი გარდასახვით ნომინალური მასპინძლები დააწინაურა. 29-ე წუთზე მეტრეველმა გაგლეჯვაზე უკვე დერეფნის შემდეგ ითამაშა და დიდი წინააღმდეგობის მიუხედავად „დუბლი“ შეასრულა. ხუციშვილმა ესეც გარდასახა - 14:5.

მეორე ტაიმში თამაში კიდევ უფრო დამძიმდა. 49-ე წუთზე არმიელთა მოლი ლელოთი საულა ნგოილევუმ დაასრულა, მაგრამ გარდასახვა კვლავ არაზუსტი იყო. დიდი ხნის განმავლობაში ანგარიში აღარ შეცვლილა, 78-ე წუთზე კი დავით ხუროშვილმა თავისი ნახევრიდან წამოიწყო კონტრშეტევა, რომელიც გაგა ქევხიშვილმა გააგრძელა და ის ‘არმიამ’ ლაშა ბარბაქაძეს სინბინის ხარჯზე შეაჩერა. ლუკა ცირეკიძემ გუნდს კარის წინ 20 მეტრიდან 3 ქულა შემატა, თუმცა ანგარიში აღარ შეცვლილა და ‘ლელომ’ არასაკმარისი გამარჯვება მოიპოვა - 17:10.

მატჩის საუკეთესო მოთამაშე ‘ლელოს’ ბურჯი ზურიკო ურთაშვილი გახდა.

RUGBY.GE