თბილისის ‘ხვამლმა’ რუსთავის ‘ხარებს’ crocobet დიდი 10-ის მე-17 ტურში 20:13 სძლია და საჩემპიონო ფლეი ოფში თამაში ვადამდე ერთი ტურით ადრე დაიბევა. თავის მხრივ, ‘ხარებმა’ გაწითლებულ დროზე გატანილი ლელოთი ნუგეშ-ქულა აიღო და ექვსეულში დარჩენა მანაც გაინაღდა.

მუხიანელებს ამ გამარჯვების შემდეგ სატურნირო ცხრილში 41 ქულა მოუგროვდათ 8-ით გაასწრეს მე-7 პოზიციაზე მყოფ ‘ლელოს’. ‘ხვამლი’ მე-4 ადგილზეა და თუ მას შეინარჩუნებს, ფლეი ოფის პირველ ეტაპზე მასპინძელი იქნება. თავის მხრივ ‘ხარებს’ 39 ქულა გაუხდა და ‘ლელოს’ 6-ით დაშორდა, რისი აღმოფხვრაც ერთ ტურში შეუძლებელია. ის ‘არმიასთან’ ერთად მეხუთე-მეექვსე ადგილებს იყოფს.

შეხვედრა „ხვამლი“ არენაზე“ ძლიერი ქარის ფონზე წარიმართა, რასაც თან ახლდა შეცდომები, ბურთის კარგვა და ხშირი შეჩერებები. მასპინძლები მეტოქის 22-ში პირველად მე-8 წუთზე შევიდნენ, ჯარიმის უფლება მოიპოვეს და ლუკა თაყაიშვილმა ანგარიში გახსნა. ‘ხარებმა’ კარგი კონტშეტევით მე-14 წუთზე უპასუხა, კობა ჯიმშელეიშვილმა ხაზი გაჭრა, მას კარგად მიყვა ლუკა წიკლაური, რომელთანაც ბურთი გაითამაშა და ზედ ლელოსთან ოფლოუდი ვაჟა ხუციშვილს გაუხერხა. ხელსაყრელი პოზიციიდან სანდრო მარგიანს გარდასახვა გაუცუდდა.

თამაში ორმხრივ, ხელდახელ შეტევებში გაგრძელდა. ‘ხარებმა’ გიორგი პეტრიაშვილის ჯარიმით უპირატესობა გაზარდა, 28-ე წუთზე კი მოთამაშეები წაკინკლავდნენ და სინბინით ხვიჩა ბუჯიაშვილი (ხარები) და ჰამლეტ გოგია (ხვამლი) დაისაჯნენ. 10-წუთიანი პერიოდით მასპინძლებმა ისარგებლეს, თაყაიშვილმა ჯარიმით შეამცირა სხვაობა, 34-ე წუთზე კი, ორმხრივი შეცდომების შემდეგ ჯოელი მბალეილევუკამ გრძელი გადაცემით გიორგი ჯობავა მარტო დატოვა და მანაც ლელოთი საკუთარი გუნდი დააწინაურა, ხოლო თაყაიშვილმა გარდასახა. ტაიმის ბოლოს ‘ხვამლმა’ ‘ხარების’ სახიფათო შეტევა მოიგერია და ტაიმი 13:8 დასრულდა.

მიუხედავად იმისა, რომ რუსთაველებს დიდი უპირატესობა ქონდათ და ლელოსთან რამდენჯერმე ძალიან ახლოს იყვნენ, მეორე ტაიმის მთელი 30 წუთი ანგარიში აღარ შეცვლილა. სტუმრები გამოუყენებელი მომენტების გამო 70-ე წუთზე დაისაჯნენ, როდესაც ‘ხვამლმა’ თავისი ნახევრიდან კონტრშეტევა წამოიწყო, გივი სოსელიამ ორ ეპიზოდში საუცხოოდ ითამაშა და მიხეილ თაყაიშვილი მიძალების შემდეგ ლელო ძელებსშუა ზაურ ლუტიძემ გაიტანა, ლუკა თაყაიშვილმა კი გარდასახა.

მატჩის მიწურულს ‘ხვამლი’ ჯერ ბაჩანა მონიავას წითელი ბარათით დაისაჯა, მერე ფრიდონ წიკლაურის სინბინით და სანდრო მარგიანმა 13-კაციან მეტოქეს გაწითლებულ დროზე ლელო გაუტანა, რომელმაც რუსთაველებს ფლეი ოფში თამაში დაუბევა - 20:13 ‘ხვამლის’ სასარგებლოდ. მატჩის საუკეთესო მოთამაშე დაჩი წიკლაური გახდა.

RUGBY.GE