ქუთაისის ‘აიამ’ ბოლნისის ‘ყოჩებს’ სტუმრად დაძაბულ ბრძოლაში 13:11 სძლია და ერთი დღის წინ დაკარგული პირველი ადგილი დაიბრუნა.
საქართველოს ჩემპიონმა განვლილ 17 მატჩში 62 ქულა მოაგროვა, ორით გაუსწრო თანაქალაქელ ‘არესს’, ხოლო ‘ბათუმს’ 4-ით, მაგრამ ამით ბრძოლა არ დასრულებულა და დასკვნით ტურში გადაწყდება, თუ ვინ დაასრულებს რეგულარულ გათამაშებას პირველ-მეორე ადგილზე და შესაბამისად, ვინ მიიღებს ფლეი ოფში უკეთეს განრიგს.
‘ყოჩებმა’ ნუგეშ-ქულა აიღო, რითაც მე-9 ადგილზე მყოფ ‘ტაოსთან’ ჩამორჩენა 4 ქულამდე შეამცირა და შესაბამისად, დასკვნით ტურში ამ გუნდებს შორის გასამართ მატჩს კიდევ უფრო დიდი ინტერესი შესძინა. აღსანიშნავია, რომ ბოლო წუთზე ლაშა მალაღურაძეს თავისი ნახევრიდან ჯარიმა რომ გაეტანა, ბოლნისელები ჩამორჩენას მინიმუმამდე დაიყვანდნენ და საქმეს გაიმარტივებდნენ, მაგრამ ასე არ მოხდა და ახლა მათ ასპინძაში ბონუს-ქულით გამარჯვება ჭირდებათ.
ბოლო დღეების წვიმის ფონზე, „რაგბი პლატოზე“ მოედანი ატალახებული იყო, რის გამოც გუნდები ხშირად მიმართავდნენ ფეხით თამაშს, ასევე ხშირი იყო უნებლიე შეცდომები და ტრავმები. შეხვედრის მსვლელობას რაც შეეხება, თავიდან 13 უპასუხო ქულა ‘აიას’ მგეზავმა გიორგი ბაბუნაშვილმა აიღო, მაგრამ მონაგარს ვეღარაფერი შემატა, ‘ყოჩებმა’ კი 11 ქულით უპასუხა და გამარჯვებამდე სულ ცოტა დააკლდა.
თამაში მასპინძლების შეტევებით დაიწყო, მაგრამ სტუმრებმა მალე იგდეს ხელთ ინიციატივა და ბაბუნაშვილის ჯარიმით ტაიმის შუაში დაწინაურდნენ. ამას მოედნის ცენტრში დაშვებული შეცდომა მოყვა, ბურთი ტიმოთი მბოლამ აიტაცა, ხაზი გაჭრა და მარჯვენა ფრთაზე ლელოში ბაბუნაშვილი დაგეზა, რომელმაც თავისივე ლელო რთული პოზიციიდან გარდასახა.
მერე ქუთაისელებმა თენგიზ პერანიძეს დაუფარეს, მას ბურჯი ბაჩუკი ბარათაშვილი მიყვა და ოვალს ფეხი წაკრა, მაგრამ მან მოედანი დატოვა. 33-ე წუთზე ბაბუნაშვილმა საკუთარ და გუნდის მონაგარს ჯარიმიდან კიდევ 3 ქულა შემატა, რაზეც მალაღურაძემ შორეული ჯარიმით უპასუხა. შესვენების წინ საკუთარ 5-მეტრიანთან ბურთი ქუთაისელებმა ვერ დაიმორჩილეს, მას რანი ფხალაძემ ფეხი წაკრა, თუმცა დარტყმის ძალა ვერც მან გათვალა - 3:13.
მეორე ტაიმი 13 წუთის დაწყებული იყო, როდესაც ‘აია’ სინბინით (ილია გაბისონია) დაისაჯა. ‘ყოჩებმა’ 5-მეტრიანი შერკინებიდან შეუტია, ბურთი დაკარგა, მაგრამ იქვე დაიბრუნა, თენგიზ პერანიძე ორ მცველს შორის შეძვრა, ნიკოლოზ რეხვიაშვილს პასი გაუხერხა და მანაც საპასუხო ლელო გაიტანა. მალაღურაძის გარდასახვა მიზანს ოდნავ ასცდა. სამაგიეროდ ლაშამ 65-ე წუთზე რთული პოზიციიდან ჯარიმა გაიტანა და სხვაობა 2 ქულამდე დაიყვანა.
დასკვნით წუთებში სიტუაცია დაიძაბა, რადგან გამარჯვება ორივე გუნდს ჰაერივით ჭირდებოდა. 74-ე წუთზე ‘ყოჩებმა’ სინბინით თემურ ჭიჭინაძე დაკარგა. 79-ე წუთზე მოედნის ცენტრში გიორგი ფრუიძე დაჯარიმდა და თავით თავში კონტაქტისთვის წითელი ბარათით დაისაჯა. მალაღურაძემ კარის წინ 52 მეტრიდან კარში დარტყმა გადაწყვიტა, მაგრამ ბურთმა მიზნამდე ვერ მიაღწია და ‘ყოჩები’ 11:13 დამარცხდა. მატჩის საუკეთესო მოთამაშე გიორგი ბაბუნაშვილი გახდა.
RUGBY.GE
