‘ბათუმმა’ სტეფანწმინდის ‘ყაზბეგს’ პრემიალური ქულით, 45:17 მოუგო, სატურნირო ცხრილში ქულებით ლიდერ ქუთაისის ‘აიას’ გაუტოლდა და მას ურთიერთშეხვედრებში უკეთესი ბალანსით გადაასწრო.
ბათუმელებს 58 ქულა მოუგროვდათ და ორით გადაასწრეს კიდევ ერთ ქუთაისურ გუნდ ‘არესს’, თუმცა ის და ‘აია’ მე-17 ტურის შეხვედრებს ხვალ გამართავენ და შესაძლოა ‘ბათუმი’ კვლავ მესამე საფეხურზე დაქვეითდეს. ‘ყაზბეგს’ 28 ქულა დარჩა და საფლეიოფო ექვსეულში მოხვედრის შანსი აღარ აქვს. ის მე-8 ადგილს იკავებს და 4-ით უსწრებს ‘ტაოს’, რომელიც ხვალ ‘არესს’ ქუთაისში ეთამაშება.
„ბათუმი არენაზე“ გამართული crocobet დიდი 10-ის მე-17 ტურის პირველ მატჩში, სტუმრები პირველსავე წუთზე დაწინაურდნენ. სტეფანწმინდელებმა ბურთი ფრთაზე სწრაფად ჩაათამაშეს, სადაც ონისე ბაზალი გაიქცა და მათე ჩქარეულს შებრუნებული გადაცემა გაუკეთა. მან მცველი მოძრაობაზე დაიჭირა და ლელო დავით მოძღვრიშვილმა გარდასახა. ‘ბათუმმა’ მე-9 წუთზე მეტოქის არაზუსტი გადაცემით ისარგებლა, ბურთს მოედნის ცენტრში პიტერ ვილიამსი დაეუფლა და ლელომდე 45 მეტრი ირბინა, ვაჟა მიქაძემ კი გარდასახვით წონასწორობა აღადგინა.
რამდენიმე წუთში ბაზალი ფრთაზე ერთხელაც გაიქცა და ფეხით ითამაშა, მაგრამ მისმა თანაგუნდელმა ბოჭვისას ბურთი ლელოში ვერ დაიმორჩილა. ტაიმის შუაში მასპინძლების ჯერი დადგა, ვილიამსზე ფრთაზე ბოჭვა გაცუდდა და მანაც მეორე ლელო გაიტანა. თამაში რომ განახლდა ბათუმელთა ბურჯი ჯაბა შათირიშვილი სინბინით დაისაჯა და ‘ყაზბეგმა’ ჯარიმით ჩამორჩენა შეამცირა, თუმცა ჯერ კიდევ კაცნაკლულმა მასპინძლებმა ფორვარდებით შეუტიეს, რამდენიმე მიძალების შემდეგ გიორგი თხილაიშვილმა ლელო გაიტანა და მიქაძემ პირველი ტაიმის ანგარიში დააფიქსირა - 19:10.
მეორე ტაიმი 8 წუთის დაწყებული იყო როდესაც თორნიკე გაბელაიამ მოლი ლელოთი დაასრულა, რაზეც ‘ყაზბეგმა’ მოლითვე და გელა მახარაშვილის ლელოთი უპასუხა, იმნაძემ კი გარდასახვით სხვაობა 7 ქულამდე დაიყვანა, მაგრამ დასკვნითი 20 წუთი სრულად მასპინძლების იყო. 62-ე წუთზე ‘ბათუმის’ ლელოს შემოქმედი ნიკა ფერსელაძე გახდა, რომელმაც მაგრად იარა და გზად სამი მბოჭავი ჩამოიცილა, შეტევა კი ლელოთი ბუბა ნოზაძემ დაასრულა და თავადვე გარდასახა.
თამაშის დასრულებამდე 10 წუთით ადრე ვილიამსმა ვაჟა მიქაძის გრძელი გადაცემის შემდეგ თავისი მესამე ლელო გაიტანა და მატჩის საუკეთესო მოთამაშეც გახდა, საბოლოო ანგარიში კი ვაჟა თაგაურმა დერეფნიდან გათამაშებული კარგი კომბინაციის შემდეგ დააფიქსირა. ნოზაძემ ბოლო ორი გარდასახვაც ზუსტად შეასრულა - 45:17.
RUGBY.GE
