სომხეთის ნაკრების ფეხბურთელებმა ოგნიენ ჩანჩარევიჩმა, გეორგი არუთინიანმა და არტურ სერობიანმა საქართველოსთან მატჩებამდე კომენტარი გააკეთეს.

ოგნიენ ჩანჩარევიჩი: „ეს არ იყო ძალიან სასიამოვნო ტრავმა მეკარისთვის, მაგრამ ეს ყველაფერი წარსულშია. ძალიან მიხარია, რომ დიდი ხნის შესვენების შემდეგ ისევ აქ ვართ შეკრებილი. დიდ ზეწოლას არ ვგრძნობ, მაგრამ მოუთმენლად ველოდები მომავალ თამაშებს".

გეორგი არუთინიანი: „უნგრეთში ძალიან კარგად მიმიღეს. გუნდში ბევრ სათამაშო დროს ვიღებ, რაც ჩემთვის ძალიან კარგია. ახლა, როდესაც მუდმივად ვთამაშობ ჩემს გუნდში, თავს უკეთ ვგრძნობ. ვგრძნობ, რომ უკეთეს ფორმაში ვარ და იმედი მაქვს, რომ ამას მოედანზე დავამტკიცებ. დიდი ინტერესით ველით საქართველოსთან თამაშებს. ჩვენი მეზობლები არიან, ასე ვთქვათ, კავკასიური დერბია. ძალიან მინდა ამ თამაშების მოგება“.

არტურ სერობიანი: „მომავალი თამაშებისთვის სერიოზულად ვემზადებით, ვიცით, რომ მეტოქე ძლიერია. მთელი სერიოზულობით მოვემზადებით დადებითი შედეგის მისაღწევად“.

საქართველოსა და სომხეთის ორმატჩიანი დაპირისპირებით ირკვევა, ვინ ითამაშებს ერთა ლიგის მომდევნო სეზონში B ლიგაში და ვინ C ლიგაში. ორი მატჩის გამარჯვებული B დივიზიონში იქნება, ხოლო დამარცხებული შესაბამისად, C დივიზიონში.

საქართველოს ნაკრებმა ერთა ლიგის გასულ სეზონში ჯგუფში 7 ქულით მესამე ადგილი დაიკავა და სწორედ ამიტომ უწევს დასარჩენ პლეი-ოფში თამაში. პირველი შეხვედრა 20 მარტს, 21:00 საათზე ერევანში შედგება, ხოლო საპასუხო 23 მარტს, 18:00 საათზე თბილისში, „დინამო არენაზე“.