„პარი სენ-ჟერმენის“ ფეხბურთელმა ხვიჩა კვარაცხელიამ „ლიონთან“ მატჩის (3:2) შემდეგ ისაუბრა. როგორც მან თქვა, რთული თამაში იყო, მაგრამ მოგება დაიმსახურეს.

„პირველ რიგში, გუნდს ვულოცავ, რადგან მოგება დავიმსახურეთ. რთული მატჩი იყო, ბოლომდე უტევდნენ. მთავარია, აქ სამი ქულა მოვიპოვეთ და უნდა გავაგრძელოთ ქულების დაგროვება, რათა ჩემპიონატი მოვიგოთ. ისინი ბოლომდე ყველა მოთამაშით შეტევას ცდილობდნენ, ასე ხდება, როცა სხვაობა მინიმალურია. დაცვაში კარგად უნდა გვეთამაშა და ეს მოვახერხეთ. ძალიან ძლიერი გუნდი ვართ. ყველა მატჩში ვაჩვენებთ, რომ კარგი გუნდი ვართ, ასე უნდა გავაგრძელოთ, ვფიქრობ, ძალიან კარგ ფეხბურთს ვთამაშობთ“, - თქვა კვარაცხელიამ.

შეგახსენებთ, რომ ხვიჩა კვარაცხელიას პსჟ-ს მაისურით ყველა ტურნირზე ჩატარებულ 9 მატჩში 2 გოლი აქვს გატანილი, ხოლო 3-ჯერ საგოლე პასი მიითვალა. კონკრეტულად ლიგა 1-ში კი - 6 თამაში, 1 გოლი და 2 საგოლე პასი.

პსჟ ლიგა 1-ს 23 ტურის შემდეგ 59 ქულით ლიდერობს და 13 ქულით უსწრებს „მარსელს“, ასე რომ, ჩემპიონობა მხოლოდ დროის საკითხია. ლუის ენრიკეს გუნდი მომდევნო ტურში 1-ელ მარტს „ლილს“ უმასპინძლებს.