„პარი სენ-ჟერმენის“ ფეხბურთელმა ხვიჩა კვარაცხელიამ სადებიუტო მატჩის შემდეგ ლიგა 1-ის ტელეარხთან მოკლე კომენტარი გააკეთა.

ქართველმა ფეხბურთელმა თქვა, რომ მომენტების გამოუყენებლობა მთავარი პრობლემა იყო, რის გამოც პსჟ-მ „რეიმსი“ ვერ დაამარცხა.

„რთული მატჩი იყო, „რეიმსი“ კარგი გუნდია, მაგრამ მოგება შეგვეძლო, რადგან ბევრი საგოლე მომენტი გვქონდა. არაფერია, მუშაობა უნდა გავაგრძელოთ და ვფიქრობ, დადებითი შედეგებიც მოვა. შეტევები უკეთ უნდა დაგვესრულებინა და ჩემი აზრით, მთავარი პრობლემა რის გამოც ვერ მოვიგეთ, მომენტების გამოუყენებლობაა“, - თქვა კვარაცხელიამ.

შეგახსენებთ, რომ პსჟ-სა და „რეიმსის“ მატჩი 1:1 დასრულდა, პარიზელთა ერთადერთი გოლი უსმან დემბელემ სწორედ კვარაცხელიას პასით გაიტანა.

„პარი სენ-ჟერმენი“ მომდევნო მატჩს ჩემპიონთა ლიგაზე სტუმრად „შტუტგარტთან“ გამართავს, სადაც კვარაცხელიას თამაშის უფლება ჯერ არ აქვს, ხოლო ლიგა 1-ის მომდევნო ტურში პირველ თებერვალს, სტუმრად „ბრესტს“ შეხვდება. პსჟ ლიგა 1-ში 19 ტურის შემდეგ დაუმარცხებელია და 47 ქულით ლიდერია.