საქართველოს ნაკრების და „ემპოლის“ მცველი საბა გოგლიჩიძე ტურინის „იუვენტუსს“ ისევ დაუკავშირეს.

Gazzetta Dello Sport-ის ცნობით, ტურინული გრანდი ქართველი ფეხბურთელის შეძენას მიმდინარე სატრანსფერო პერიოდში განიხილავს. „იუვეს“ დაცვის ხაზში გაძლიერება სჭირდება, ხოლო გოგლიჩიძე ტურინელთათვის ორ მნიშვნელოვან ასპექტს აკმაყოფილებს: ახალგაზრდა და პერსპექტიული ფეხბურთელია, თანაც სატრანსფერო ფასი მაღალი არ არის, რამაც შეიძლება ტრანსფერს ხელი შეუწყოს.

„იუვეს“ მხრიდან გოგლიჩიძის მიმართ ინტერესი აქამდეც არსებობდა, მიმდინარე სეზონში კარგი თამაშის ფონზე, მაგრამ მანამდეც, სანამ „ემპოლიში“ გადავიდოდა, როცა ტურინელებს საბას დამატება მეორე გუნდში სურდათ.

გარდა ამისა, ცნობილია, რომ გოგლიჩიძის მიმართ ინტერესს „მილანიც“ იჩენს, რომელმაც უკვე დაიწყო პირველი ნაბიჯების გადადგმა. საბას დაცვაში, როგორც ცენტრში, ისე მარჯვენა ფლანგზე თამაში შეუძლია.

აქვე გეტყვით, რომ სერია A-ს მიმდინარე სეზონში „ემპოლის“ მაისურით საბა გოგლიჩიძემ 17 მატჩი ჩაატარა.