ტურინის „იუვენტუსს“ „მანჩესტერ იუნაიტედიდან“ ჯოშუა ზირკზეს გადაბირება სურს. ამის შესახებ იტალიური მედია იტყობინება.

Sky Sport-ის ცნობით, იტალიელები უკვე მუშაობენ ტრანსფერზე, რათა ნიდერლანდელი ფეხბურთელი იჯარით გადაიბირონ. „იუვეს“ ფორვარდის პოზიციაზე სერიოზული პრობლემები აქვს, რადგან დუშან ვლაჰოვიჩის შემცვლელი არ ჰყავს, ხოლო თვითონ სერბის თამაშიც კრიტიკას ვერ უძლებს.

ზირკზეს ძალიან კარგად იცნობს ტურინელთა მთავარი მწვრთნელი ტიაგო მოტა, რომელიც ტრანსფერი ინიციატორია. სწორედ მოტას ხელმძღვანელობით ზირკზეც შარშან „ბოლონიაში“ საუკეთესო სეზონი ჰქონდა.

ზირკზემ „მანჩესტერში“ მოლოდინი ვერ გაამართლა და მიმდინარე სეზონის პირველ ნახევარში 28 მატჩში მხოლოდ 11-ჯერ იყო ძირითად შემადგენლობაში, 4 გოლი გაიტანა და 2 საგოლე პასი გააკეთა. ამიტომაც, „მანჩესტერმა“ ის შეიძლება გაუშვას, თანაც, ფანების მხრიდან კრიტიკის ობიექტია.