„ნაპოლი“ იტალიის სერია A-ს მე-15 ტურში საკუთარ მოედანზე „ლაციოსთან“ დამარცხდა და ლიდერის პოზიცია დაკარგა.
ანტონიო კონტეს გუნდმა ბოლო სამ დღეში მეორე მარცხი განიცადა „ლაციოს“ წინააღმდეგ: პირველად იტალიის თასზე სტუმრად 1:3, სადაც კონტემ სათადარიგო შემადგენლობით ათამაშა გუნდი, თუმცა არც „ლაციო“ ყოფილა საუკეთესო შემადგენლობით.
ამჯერად, რომაელებმა ნეაპოლში იმარჯვეს, გუსტავ ისაკსენის ძალიან ლამაზი გოლით, რომელმაც 79-ე წუთზე გაიტანა ერთადერთი გოლი.
ხვიჩა კვარაცხელიამ შეუცვლელად ითამაშა, თანაგუნდელთა ფონზე ყველაზე აქტიურიც იყო, პირველი ტაიმის ბოლოს საჯარიმო დარტყმით ახლოს იყო გოლთან, მაგრამ ბურთი მცირედით ასცდა კარს. ქართველ ფეხბურთელს სერია A-ს მიმდინარე სეზონში ჩატარებულ 15 მატჩში 5 გოლი აქვს გატანილი, ხოლო 3-ჯერ საგოლე პასი გააკეთა.
„ნაპოლი“ 32 ქულით მეორე ადგილზეა და ორი ქულით ჩამორჩება ახალ ლიდერს, ბერგამოს „ატალანტას“, ხოლო მომდევნო ტურში 14 დეკემბერს, „უდინეზეს“ ესტუმრება.
