ინგლისის პრემიერლიგის მე-13 ტურში „ლივერპულმა“ „მანჩესტერ სიტის“ აჯობა და უპირატესობა კიდევ უფრო გაზარდა.

მეორე მხრივ, „მანჩესტერ სიტის“ კოშმარული პერიოდი გრძელდება: 26 ოქტომბრის მერე არ მოუგია - 7 მატჩი, 1 ფრე და 6 წაგება! პეპ გვარდიოლას სამწვრთნელო კარიერაში ასეთი ცუდი შედეგი აქამდე არასდროს ჰქონია.

დიდებულ ფორმაში მყოფმა „ლივერპულმა“ ყველაფერში აჯობა „სიტის“, უფრო დიდი სხვაობით მოგებაც შეეძლო, თუმცა, 2:0-საც არაფერი დაეწუნება. პირველ ტაიმში კოდი გაკპომ გაიტანა მოჰამედ სალაჰის პასით, მეორე ტაიმში ეგვიპტელმა პენალტით თვითონაც შეაგდო და საბოლოოდ, „წითლებმა“ ისევ მოიგეს.

არნე სლოტის გუნდი უბრალოდ ფანტასტიკურ სეზონს ატარებს.

„ლივერპული“ 34 ქულით ლიდერობს პრემიერლიგას და „მანჩესტერ სიტის“ 11 ქულით უსწრებს, არადა, ოთხი ტურის წინ, „სიტი“ ერთი ქულით უსწრებდა კონკურენტს. გვარდიოლას გუნდმა კონკრეტულად პრემიერლიგაში ზედიზედ მეოთხე მარცხი განიცადა და უკვე „ჩელსისა“ და „არსენალსაც“ ჩამორჩა, რომელთა აქტივში 25-25 ქულაა.