სასიხარულო ამბავი ესპანეთიდან. “ლაბორალ კუჩას” ქართველი კალათბურთელი თორნიკე შენგელია, რომელიც 24 აგვისტოს უნგრეთთან სანაკრებო მატჩში დაშავდა, სრულად მომჯობინდა და ესპანეთის ჩემპიონატში პირველი მატჩი ჩაატარა.

ბასკები მშობლიურ “ფერნანდო ბუესა არენაზე” 7 869 მაყურებლის თვალწინ მალაგის “უნიკახას” დაუხვდნენ და მართალია, მე-2 ნახევარში მეტოქეს 13 ქულით აჯობეს, პირველი ტაიმის ჩამორჩენა ვეღარ “გადაფარეს” და 79:88 წააგეს.

შენგელია სასტარტო ხუთეულში არ ყოფილა, მოედანზე გატარებულ 14:17 წუთში კი 7 ქულა, 2 მოხსნა და 1 ჩაჭრა მიითვალა. “თოკომ” 2-დან 1 ორქულიანი და 2-დან 1 სამქულიანი ჩააგდო, რასაც 2 საჯარიმო წაამატა, 4 პერსონალური ფოლი მიიღო, მის წინააღმდეგ კი 3-ჯერ დაჯარიმდნენ.

“ლაბორალ კუჩას” რიგებში 21 ქულით საუკეთესო ესპანელი ფერნანდო სან ემეტერიო იყო, მალაგელებს კი 15-15 ქულით ლიტველმა მინდაუგას კუზმინსკასმა და ამერიკელმა რაიან ტოლსონმა ულიდერეს. ისიც ვთქვათ, რომ უილ ტომასმა, რომელსაც ქართული პასპორტი გააჩნია, “უნიკახას” 20:21 წუთში 9 ქულა და 4 მოხსნა შესძინა.

“ლაბორალ კუჩა”, რომელსაც ესპანეთის ჩემპიონატში ორივე მატჩი წაგებული აქვს, შიდა ასპარეზზე მომდევნო მატჩს 18 ოქტომბერს სტუმრად “ანდორასთან” გამართავს, 15-ში კი ევროლიგაში სადებიუტო შეხვედრა ელის, შინ, ლიტვურ “ნეპტუნასთან”.