უკრაინის ნაკრებს კიდევ ერთი ფეხბურთელი გამოაკლდა. „ჟირონას“ ნახევარმცველი ვიქტორ ციგანკოვი ბარძაყის დაზიანების გამო საქართველოს წინააღმდეგ ვერ ითამაშებს.

ციგანკოვმა ტრავმა ჩემპიონთა ლიგაზე „ფეიენოორდთან“ შეხვედრაში მიიღო და როგორც გაირკვა, ლაზარეთში დაახლოებით 5 კვირას გაატარებს. მას უკრაინის ნაკრებში 57 მატჩში 13 გოლი აქვს გატანილი.

უკრაინის ნაკრებს ციგანკოვამდე ტრავმების გამო ასევე ძალიან მნიშვნელოვანი ფეხბურთელები გამოაკლდა - ტარას სტეპანენკო, ოლეკსანდრ ზინჩენკო, ვიტალი მიკოლენკო და რუსლან მალინოვსკი.

შეგახსენებთ, რომ უკრაინა-საქართველოს მატჩი 11 ოქტომბერს, პოლონეთის ქალაქ პოზნანში გაიმართება.