საქართველოს ეროვნული ნაკრები სექტემბრის წარმატებული მატჩების შემდეგ ფიფას რეიტინგში დაწინაურდება.

ფიფა რეიტინგს ოფიციალურად 19 სექტემბერს განაახლებს, მაგრამ უკვე ცნობილია, რომ ვილი სანიოლის გუნდი სამი საფეხურით დაწინაურდება.

საქართველომ ჩეხეთსა (4:1) და ალბანეთთან (1:0) გამარჯვებების შედეგად რეიტინგს 16.81 ქულა შემატა, შესაბამისად, ჯამში 1.378.22 ქულით 70-ე ადგილიდან 67-ე პოზიციამდე აღზევდა. აღსანიშნავია, რომ ერთ-ერთი, ვინც უკან მოიტოვა, ალბანეთის ნაკრებია.

შეგახსენებთ, რომ საქართველოს ნაკრებს ერთა ლიგაზე ორი ტურის შემდეგ 6 ქულა აქვს და B დივიზიონის პირველ ჯგუფში ლიდერია. მომდევნო სანაკრებო პაუზა ოქტომბერში იქნება, საქართველოს ნაკრები 11 ოქტომბერს, პოზნანში უკრაინას შეხვდება, ხოლო 14 ოქტომბერს, ბათუმში ალბანეთს უმასპინძლებს.