ქუთაისის „ტორპედოს“ მცველმა მამადუ სახომ კონფერენს ლიგის მეორე საკვალიფიკაციო ეტაპზე ნიქოზიის „ომონიასთან“ საპასუხო შეხვედრის წინ ისაუბრა. როგორც მან თქვა, გუნდი მაქსიმალურად დაიხარჯება სასურველი შედეგისთვის.

„მოედნის მიღმა ბევრი საუბარი არ მიყვარს, თუმცა შემიძლია გითხრათ, რომ ხვალინდელ მატჩში სასურველი შედეგის მისაღწევად მაქსიმალურად დავიხარჯებით. ვართ თავდაჯერებულები, დანებებას არ ვაპირებთ… ფეხბურთი განსაკუთრებულია, მეორე შანსი გვეძლევა და პირველ მატჩში დაშვებული შეცდომების აქ გამოსწორებას ვეცდებით.

რთული მეტოქე გვყავს, მაგრამ მარტივი მატჩი არც “ომონიას” ექნება. აქ, ქუთაისში, ჩვენი გულშემატკივრის წინ, რომელიც ვიმედოვნებ, რომ სტადიონს გაავსებს, ყველაფერი შესაძლოა მოხდეს. ჩვენ მზად ვართ. მოვუწოდებ გულშემატკივარს, მოვიდნენ სტადიონზე“, - თქვა სახომ.

შეგახსენებთ, რომ „ტორპედოს“ პირველი მატჩი 1:3 აქვს წაგებული, ხოლო ქუთაისში შეხვედრა 1-ელ აგვისტოს, 21:00 საათზე გაიმართება.