„ვალენსიას“ მთავარმა მწვრთნელმა რუბენ ბარახამ „სოსიედადთან“ მატჩის (0:1) შემდეგ ისაუბრა. როგორც მან თქვა, მასაც სურს უკეთესი შედეგი, მაგრამ რეალობა სხვანაირია.

„ფეხბურთში სხვაობას გოლი ქმნის. მესმის, რომ გულშემატკივარი შეიძლება იყოს იმედგაცრუებული და გაბრაზებული, მესმის, რომ ყველას მეტი გვინდა, მაგრამ ცხადია, რომ უნდა ვიცოდეთ, როგორ ვიცხოვროთ ჩვენს რეალობასთან ერთად.

შეიძლება მსურდეს ფერარი, მაგრამ შკოდას ტარება თუ მომიწევს... ეკონომიკური განსხვავებები ქმნის სხვაობას, რთულ გზაზე ვართ, მაგრამ რაც ამ სეზონში ვნახეთ, უნდა გავაანალიზოთ მომდევნო სეზონისთვის. შესაძლებლობების გარეშე არ შეგვიძლია რაღაცის ასრულება, რაც გვინდა. უბრალოდ, უნდა ვცადოთ მიზნების მიღწევა იმ შესაძლებლობებით, რაც გვაქვს და ჩვენ ამ ბავშვებთან ერთად რაღაცის აშენება მოვახერხეთ“, - თქვა ბარახამ.

შეგახსენებთ, რომ „ვალენსია“ 48 ქულით მეცხრე ადგილზეა და უკვე 5 ტურია არ მოუგია, ხოლო მომდევნო ტურში 19 მაისს, „ჟირონას“ უმასპინძლებს.