საქართველოს ნაკრების ფეხბურთელი ხვიჩა კვარაცხელია მზადაა „ნაპოლიში“ მინიმუმ კიდევ ერთი სეზონით დარჩეს.

Gazzetta Dello Sport-ის ინფორმაციით, კვარაცხელია თანახმაა კლუბთან ახალი კონტრაქტი გააფორმოს, 2028 ან 2029 წლამდე, ხოლო ხელფასი სეზონში 4.5 მილიონ ევრომდე გაეზრდება.

წყაროს თანახმად, მიუხედავად იმისა, რომ ქართველ ფეხბურთელს დაინტერესებული კლუბები არ აკლია, მას სურს, რომ ნეაპოლში მინიმუმ 2025 წლის ზაფხულამდე დარჩეს. გარდა ამისა, ახალ კონტრაქტში სავარაუდოდ ჩაიდება გამოსასყიდი პუნქტიც, რომლის ფასზე მხარეები ჯერ არ შეთანხმებულან.

ზოგადად, ხვიჩა კვარაცხელიას კონტრაქტის განახლებაზე ძალიან დიდი ხანია საუბრობენ, მაგრამ ჯერჯერობით, ეს ოფიციალურად არ მომხდარა.

„ნაპოლი“ 30 მარტს ბერგამოს „ატალანტას“ უმასპინძლებს, მაგრამ ამ შეხვედრაში ქართველი ფეხბურთელის მონაწილეობა ჯერჯერობით საეჭვოა.