ლუქსემბურგის ნაკრების მთავარმა მწვრთნელმა ლუკ ჰოლტცმა პრესკონფერენცია გამართა. როგორც მან თქვა, ის ოპტიმისტურადაა განწყობილი საქართველოსთან მატჩის წინ.

„ჯერ არ ვიცით, შეძლებს თუ არა, მარვინ მარტინში საქართველოში თამაშს, მაგრამ კუნთის ტრავმისგან გამოჯანმრთელების პროცესი ძალიან დადებითად მიმდინარეობს, იმაზე სწრაფად, ვიდრე გვეგონა. თუ მზად იქნება პირველი მატჩისთვის შესანიშნავი იქნება, თუ არადა, მეორე შეხვედრაც გვექნება! იგივე სიტუაცია ოლივიე ტილთან დაკავშირებით.

ფსიქოლოგიური მომენტი ძალიან მნიშვნელოვანია, მაგრამ იმ გამოცდილებით, რაც ახლა ჩვენს ბიჭებს აქვთ, დარწმუნებული ვარ, რომ ისინი შიშის გარეშე იქნებიან და თამამად ითამაშებენ. ყურადღება არაფერს უნდა მივაქციოთ, მოვერიდოთ ემოციებზე აყოლას, მათ შორის მეც, თორემ შეიძლება სიტუაცია გართულდეს, როცა გადაწყვეტილების წინაშე აღმოვჩნდებით.

პენალტების სერია? ამის შესახებ მეკარეების მწვრთნელს ვესაუბრე და მოვემზადებით. თუმცა, ვარჯიშზე პენალტის დარტყმა სხვა არის, ხოლო 50 000 მაყურებლის წინაშე - სხვა, გული უფრო ძლიერად გიცემს. ზოგს ძლიერი ხასიათი აქვს, სხვებზე ნაკლებად ემოციურია. მთავარია, საკუთარ თავში დარწმუნებული ვიყოთ, არა ამპარტავანი, მაგრამ თავდაჯერებული.

ჩემს მეუღლეს ვუთხარი, რომ ამ შაბათ-კვირას არაფერი დაეგეგმა. მინდა, რაც შეიძლება მეტი მატჩი ვნახო. ბოლო კვირებში ბევრი ტრავმები გვქონდა და ზოგი ვერ ითამაშებს. გერსონ როდრიგესმა მითხრა, რომ მის კლუბში, „სლოვანში“ მოთამაშე ქართველებს თვითონ შეუძლიათ გადაწყვიტონ ითამაშებენ თუ არა, ბოლო მატჩს სანაკრებო პაუზამდე. წარმოიდგინეთ, რა ვურჩიე როდრიგესს...

საქართველოს ნაკრები ისე თამაშობს, როგორც მისი მწვრთნელი, ვილი სანიოლი თამაშობდა: დიდი მონდომებით, კონცენტრირებით და მეტოქეს შეცდომებს არ პატიობს, მაგრამ შეცდომების დაშვებას ჩვენ არ ვაპირებთ“, - თქვა ჰოლტცმა.

შეგახსენებთ, რომ საქართველო ლუქსემბურგის ნაკრებს 21 მარტს, თბილისში, „დინამო არენაზე“ უმასპინძლებს. ამ წყვილში გამარჯვებული გუნდი 26 მარტს, ფინალში საბერძნეთსა და ყაზახეთს შორის უმჯობესს შეხვდება. ფინალის მასპინძელიც საქართველო-ლუქსემბურგს შორის გამარჯვებული იქნება.