სერია A-ს მე-18 ტურში „იუვენტუსმა“ „რომა“ 1:0 დაამარცხა. ეს იყო მასიმილიანო ალეგრის კარიერაში 76-ე მოგება ანგარიშით 1:0, რაზეც „ბებერი ქალბატონის“ მწვრთნელმა მატჩის მერე იხუმრა კიდეც.

„არა, არ მაწუხებს ამ ანგარიშით გამარჯვება. იმედი მაქვს, კიდევ 152-ჯერ მოვიგებ 1:0-ით, თუმცა, შეიძლება ზოგჯერ 3:0 ან 4:0 მოვიგოთ. მნიშვნელოვანია იმის გაცნობიერება, ვის წინააღმდეგ თამაშობ და „რომას“ დამარცხება ადვილი არ იყო.

გასულ სეზონშიც ცუდი შედეგი არ გვქონია, მაგრამ 10 ქულას ყოველ სამ საათში გვაკლებდნენ. 43 ქულა გვაქვს და დელიკატური მატჩი იყო სატურნირო ცხრილისთვის, რადგან „რომასთან“ უპირატესობა უნდა შეგვენარჩუნებინა და დამსახურებულად მოვიგეთ. მეტოქეს თითქმის არ მივეცით მომენტის შექმნის შესაძლებლობა. ახლა იტალიის თასზე ვიფიქრებთ და შემდეგ პირველი წრის საუკეთესოდ დასრულებას ვეცდებით“, - თქვა ალეგრიმ.

შეგახსენებთ, რომ „იუვენტუსი“ მეორე ადგილზეა და ლიდერ „ინტერს“ მხოლოდ 2 ქულით ჩამორჩება.