ჩემპიონთა ლიგის B ჯგუფში ასპარეზობა დასრულდა. ბოლო ტურის წინ მხოლოდ ის წყდებოდა, ვინ გავიდოდა მესამე ადგილზე და შესაბამისად, ევროპა ლიგაზე.

პირველი და მეორე ადგილის ბედი ისედაც ცნობილი იყო: „არსენალი“ და მერე პსვ. ისინი ერთმანეთს „ფილიპს არენაზე“ შეხვდნენ, სადაც გუნდებმა ქულები გაიყვეს. თავიდან ლონდონელები იგებდნენ, მაგრამ მერე მასპინძლებმა გაათანაბრეს და ქულა მოიპოვეს. შედეგად, „არსენალმა“ 13 ქულით დაასრულა გამოსვლა ჯგუფში, პსვ-მ 9 ქულით.

ევროპა ლიგის საგზური კი „ლანსს“ დარჩა, რომელმაც საკუთარ მოედანზე კონკურენტი „სევილია“ 2:1 დაამარცხა. ფრანგებმა 8 ქულით მესამე ადგილი დაიკავეს, „სევილიამ“ კი ჯგუფურ ეტაპზე კოშმარულად იასპარეზა - მხოლოდ 2 ქულა მოიპოვა. ისიც აღსანიშნავია, რომ ანდალუსიელები ვერ გადავიდნენ თავიანთ საყვარელ ტურნირზე, რომლის მოქმედი ჩემპიონები არიან.

პსვ ეინდჰოვენი - „არსენალი“ 1:1 (0:1)

გოლები: 0:1 ნკეტია (42), 1:1 ვირტესენი (50)

„ლანსი“ – „სევილია“ 2:1 (0:0)

გოლები: 1:0 ფრანკოვსკი (63, პენ), 1:1 სერხიო რამოსი (79, პენ), 2:1 ფულჯინი (90)