„ნაპოლის“ დღევანდელ ვარჯიშში ხვიჩა კვარაცხელიამ მონაწილეობა მიიღო. ქართველმა ფეხბურთელმა გუნდთან ერთად ივარჯიშა, შესაბამისად, უდიდესი ალბათობით, „ბრაგასთან“ მისი თამაშის საკითხი საეჭვო აღარ არის.
კვარაცხელიას გრიპი ჰქონდა, რის გამოც კვირას ვარჯიში ვერ მოახერხა. თუმცა, სწრაფად გამოჯანმრთელდა.
„ნაპოლი“ „ბრაგას“ 12 დეკემბერს, ჩემპიონთა ლიგის ჯგუფური ეტაპის ბოლო ტურში შეხვდება. აღსანიშნავია, რომ გუნდთან ერთად არ არის ვიქტორ ოსიმენი, რომელიც მაროკოში გაფრინდა, სადაც აფრიკის წლის საუკეთესო ფეხბურთელი გამოვლინდება, ის კი სამ ნომინანტს შორისაა მოჰამედ სალაჰსა და აშრაფ ჰაკიმისთან ერთად.
„ბრაგასთან“ ოსიმენის თამაშის საკითხი კითხვის ნიშნის ქვეშ არ არის, მაგრამ კლუბში მაინც არ მოეწონათ ნიგერიელის გადაწყვეტილება, რომელიც მნიშვნელოვანი მატჩის წინ ვარჯიშს დააკლდა და სხვა ქვეყანაში გაფრინდა.
