„მილანის“ ყოფილმა მენეჯერმა არიედო ბრაიდამ ხვიჩა კვარაცხელიას და რიკარდო კაკას შედარებაზე ისაუბრა.

ბრაიდა კაკას კარგად იცნობს, რადგან ისინი „მილანში“ ერთ პერიოდში იყვნენ, თუმცა, ამის მიუხედავად, ბრაიდა ფიქრობს, რომ ხვიჩას შეუძლია ბრაზილიელ ფეხბურთელზე დიდი კარიერა ჰქონდეს.

„ყოველთვის არის ვიღაც, ვინც გაჯობებს. კაკა დიდი ფეხბურთელი იყო, კვარაცხელია კი ძალიან მომწონს და დღევანდელ ფეხბურთში განსხვავებას სწორედ ასეთი მოთამაშეები ქმნიან. საჭიროა ფეხბურთელები, რომლებიც მეტოქეს ატყუებენ, წინააღმდეგ შემთხვევაში ყველა თამაში 0:0 დასრულდება.

თუკი ნაპოლიმ გუშინ კარში ერთადერთი დარტყმით მოიგო, ეს კვარაცხელიას დამსახურებაა. ქართველისნაირი ფეხბურთელი შექებას ყველასგან იმსახურებს. მას შეუძლია კაკას აჯობოს კიდეც. ორივე უზარმაზარი ფეხბურთელია. კვარაცხელიას ვუსურვებ, რომ კაკას აჯობოს“, - თქვა ბრაიდამ.

შეგახსენებთ, რომ მიმდინარე სეზონში ხვიჩა კვარაცხელიამ ყველა ტურნირზე 11 მატჩში 3 გოლით, 4 საგოლე პასით და 2 მოპოვებული პენალტით შეძლო თავის გამოჩენა.