სერბეთის დედაქალაქ ბელგრადში მიმდინარე მსოფლიოს ჩემპიონატზე ბერძნულ-რომაულ ჭიდაობაში ლერი აბულაძე ფინალში გავიდა.

63 კგ წონით კატეგორიაში აბულაძემ ჯერ თურქი ენეს ბაშარი დაამარცხა 4:3, მერე უკრაინელ ოლეკსანდრ ჰრუშინს აჯობა (1:1), ხოლო ნახევარფინალში ფრანგ სტეფან კლემენს 3:1 სძლია. შედეგად, ხვალ ფინალში იჭიდავებს, რომელიც მსოფლიოს ჩემპიონატზე მისთვის ზედიზედ მესამე ფინალი იქნება. ლერის ფინალში დაპირისპირება აზერბაიჯანელ მურად მამადოვთან მოუწევს.

67 კგ წონით კატეგორიაში ჯონი ხეცურიანმა ბულგარელი ივო ილიევი (7:0), და რუსი ალიაქსანდრ ლიავონჩიკი (5:1) დაამარცხა, მაგრამ მეოთხედფინალში ყირგიზ ამანტურ ისმაილოვთან მარცხი განიცადა (0:10), რომელიც ფინალში ვერ გავიდა და ქართველსაც რეპეშაჟის შანსი არ მიეცა.

87 კგ წონით კატეგორიაში ლაშა გობაძემ თავიდან სულთან ალი დამენს 8:1 მოუგო, მერე ხორვატ ივან ჰუკლელს 6:2 სძლია, მაგრამ მერვედფინალში ბულგარელ სემენ ნოვიკოვთან 1:3 წააგო. ნოვიკოვი ფინალში ვერ გავიდა და გობაძეც მედლისთვის ვეღარ იბრძოლებს.

დღესვე, რეპეშაჟში გამოვიდა ფრიდონ აბულაძე (60 კგ), რომელმაც ლიეტუველ იუსტას პეტრავიჩუსს 2:1 აჯობა, მაგრამ უზბეკ ისლომიონ ბახრამოვთან 4:7 წააგო და მედლისთვის ვერ იბრძოლა.

შეგახსენებთ, რომ ბერძნულ-რომაულ ჭიდაობაში მსოფლიოს ჩემპიონატზე საქართველოს ნაკრების აქტივში მხოლოდ ერთი ვერცხლის მედალია, რომელიც ნუგზარ წურწუმიამ მოიპოვა, ბოლო გამომსვლელი კი, ლერი აბულაძე იქნება. აღსანიშნავია, რომ გუნდმა ამ ჩემპიონატზე ოლიმპიური ლიცენზია ვერ მოიპოვა.