ბორჯღალოსნების სამწვრთნელო შტაბმა 2023 წლის მსოფლიო თასის მეორე მატჩში, პორტუგალიასთან გასამართი შეხვედრისთვის 23-კაციანი შემადგენლობა დაასახელა.

პირველ ტურში საქართველო ავსტრალიას 9 სექტემბერს ეთამაშა (15:35), მეორე ტურში ისვენებდა და მოედანს ორკვირიანი შესვენების შემდეგ უბრუნდება. პორტუგალიას 23 სექტემბერს, საქართველოს დროით 16 საათზე ტულუზში ვერკინებით. პირველი მატჩის შემდეგ სასტარტო შემადგენლობაში 8 ცვლილებაა.

ტრავმა მოიშუშა და მოედანს უბრუნდა მესამეხაზელი ბექა საღინაძე, რომელსაც სამივე გასახურებელი თამაში და ავსტრალიასთან შეხვედრა გაუცდა. მეორე ფლანკერი კვლავ თორნიკე ჯალაღონია, ხოლო შრრკინების შემკვრელი ბექა გორგაძე იქნება.

მეორე ხაზში თამაშს იწყებს და კოტე მიქაუტაძეს შეუწყვილდება ლადო ჩაჩანიძე, რომელიც მსოფლიო თასზე სადებიუტო შეხვედრას ჩაატარებს.

შეიცვალა ორივე ბურჯი. მიმდინარე მსოფლიო თასზე პირველად ითამაშებს მიხეილ ნარიაშვილი. ჯამში ის მესამე მსოფლიო თასს თამაშობს. მარქაფიდან დაწინაურდა ბექა გიგაშვილი, კვაჭმა შალვა მამუკაშვილმა კი ადგილი შეინარჩუნა.

სრულად შეიცვალა ღერძი. მარქაფიდან ძირითადში დაწინაურდნენ გელა აფრასიძე და თედო აბჟანდაძე. ასევე მარქაფიდან დაწინაურდა და ცენტრში გუნდის კაპიტან მერაბ შარიქაძეს შეუწყვილდება გიორგი კვესელაძე. თავის მეოთხე მსოფლიო თასზე პირველ შეხვედრას ჩაატარებს ფრთა სანდრო თოდუა. აკაკი ტაბუცაძე და დავით ნინიაშვილი კვლავ დამწყებთა შორის არიან.

კვაჭი თენგიზ ზამთარაძე, ბურჯი გურამ გოგიჩაშვილი და მესამეხაზელი გიორგი ცუცქირიძე თააშს ამჯერადაც მაქაფიდან იწყებენ. ავსტრალიასთან ძირითადში იყვნენ და ამჯერად შეცვლაზე არიან გურამ პაპიძე, ნოდარ ჭეიშვილი, ვასილ ლობჟანიძე, ლუკა მატკავა და დემურ თაფლაძე.

50

მსოფლიო თასზე პორტუგალიასთან მატჩი სანიშანსვეტო იქნება რამდენიმე ბორჯღალოსნისთვის. ტულუზში 50-ე კეპს მოიხვეჭენ გელა აფრასიძე, გიორგი კვესელაძე და ნოდარ ჭეიშვილი.

გუნდს 50-ედ უკაპიტნებს მერაბ შარიქაძე, რომელიც ბორჯღალოსნების კვართით 98-ე მატჩს ატარებს და თუ მსოფლიო თასის დანარჩენ ორ შეხვედრაშიც მიიღებს მონაწილეობას, მე-7 ქართველი ცენტურიონი გახდება.

მთლიანობაში, სასტარტო შემადგენლობაში მყოფი 15 მორაგბის კეპების ჯამი 814-ს შეადგენს (403 ხაზი, 411 შერკინება). 258-ია მარქაფაში მყოფი მორაგბეების კეპების ჯამი.

2023 წლის მსოფლიო თასი. III ტური. გ ჯგუფი საფრანგეთი. ტულუზი. „სთედიუმ დე ტულუზ“ 23 სექტემბერი. 16:00 საქ. დრო საქართველო – პორტუგალია საქართველო

ხაზი: 15. დავით ნინიაშვილი (ლიონი), 14. აკაკი ტაბუცაძე (შავი ლომი), 13. გიორგი კვესელაძე (გლოსთერი), 12. მერაბ შარიქაძე (შავი ლომი, კაპ.), 11. ალექსანდრე თოდუა (შავი ლომი), 10. თედო აბჟანდაძე (მონტობანი), 9. გელა აფრასიძე (ბეიონი);

შერკინება: 1. მიხეილ ნარიაშვილი (შავი ლომი), 2. შალვა მამუკაშვილი (შავი ლომი), 3. ბექა გიგაშვილი (ტულონი), 4. ლადო ჩაჩანიძე (ნევერი), 5. კოტე მიქაუტაძე (ბეიონი), 6. თორნიკე ჯალაღონია (ბიარიცი), 7. ბექა საღინაძე (ლიონი), 8. ბექა გორგაძე (პო).

მარქაფა: 16. თენგიზ ზამთარაძე (შავი ლომი), 17. გურამ გოგიჩაშვილი (რასინგ 92), 18. გურამ პაპიძე (პო), 19. ნოდარ ჭეიშვილი (შავი ლომი), 20. გიორგი ცუცქირიძე (სტად ფრანსე); 21. ვასილ ლობჟანიძე (ბრივი), 22. ლუკა მატკავა (შავი ლომი), 23. დემურ თაფლაძე (შავი ლომი).

RUGBY.GE