კვიპროსის ნაკრების მთავარმა მწვრთნელმა თემურ ქეცბაიამ ესპანეთთან 0:6 წაგების შემდეგ კომენტარი გააკეთა. როგორც მან თქვა, ესპანეთი სხვა დონეზეა და კვიპროსს არ შეუძლია მას კონკურენცია გაუწიოს.

„ეს სხვა დონეა, რომელსაც ჩვენ ვერ მივაღწევთ, მთავარია სწორი ფეხბურთი, რასაც ისინი თამაშობენ. არც ერთ ესპანელ ფეხბურთელს 90 წუთი ზედმეტი არაფერი გაუკეთებია, გააკეთეს ის, რაც უნდა გაეკეთებინათ. ფეხბურთელებს ვერაფერს დავაბრალებ, მაგრამ ჩვენ ამ დონისგან შორს ვართ.

ჩვენ დავამარცხეთ საბერძნეთი და ისრაელი, ამჯერად, ვცდილობდით მეტოქე შეგვეზღუდა, რომ ბევრი გოლი არ გაგვეშვა, მაგრამ ასეთ გუნდს რომ ეთამაშები და გყავს ფეხბურთელები, რომლებიც არ თამაშობენ ან უკლუბოდ არიან, უკეთესს რას უნდა ელოდო? რაც ვართ, ესაა, ასეთი თამაშებისგან უნდა ვისწავლოთ, ესპანეთის დონეზე რომ ითამაშო, ეს ნიშნავს, რომ სხვა პლანეტაზე ხარ“, - თქვა ქეცბაიამ.

შეგახსენებთ, რომ კვიპროსი ჯგუფში უქულოდ ბოლო ადგილზეა, საქართველოს ნაკრებს ქეცბაიას გუნდი 15 ოქტომბერს ესტუმრება.