ყაზახეთის ნაკრები ევროპის ჩემპიონატისკენ მიიწევს! ევროშესარჩევის მეექვსე მატჩში ყაზახებმა შინ ჩრდილოეთ ირლანდიას 1:0 აჯობეს და მეოთხე გამარჯვება მოიპოვეს.

შედეგად, ყაზახეთს H ჯგუფში 12 ქულა აქვს (4 მოგება, 2 წაგება) და ფინეთთან ერთად მესამე-მეოთხე ადგილს იყოფს. თუმცა, ახლოს არიან ჯგუფის ლიდერები - დანია და სლოვენია, რომელთაც 13-13 ქულა აქვთ. ამ ტურში დანიამ ფინეთში 1:0 მოიგო, ხოლო სლოვენიამ სან მარინო 4:0 გაანადგურა.

წინ კიდევ ოთხი ტურია, ყაზახეთს ერთი გამარჯვება პრაქტიკულად განაღდებული აქვს, რადგან სან მარინოს უნდა უმასპინძლოს, თუმცა, სამი რთული საგარეო მატჩი ელოდება, დანიაში, ფინეთსა და სლოვენიაში. ნებისმიერ შემთხვევაში, გუნდს კარგი შანსი გააჩნია, რაც უკვე დიდებული შედეგია.