„დინამო თბილისის“ ფეხბურთელი გიორგი მოისწრაფიშვილი კარიერას „ბევერენში“ გააგრძელებს. ტრანსფერი ორივე კლუბმა ოფიციალურად დაადასტურა.

21 წლის ნახევარმცველი „ბევერენს“ სეზონის ბოლომდე იჯარით და გამოსყიდვის უფლებით შეუერთდა და 77-ნომრიანი მაისური მოირგო.

„ბევერენი“ ბელგიის მეორე ლიგაში გამოდის, სადაც ოთხ ტურში ოთხი ქულა აქვს მოპოვებული და მე-11 ადგილს იკავებს.

გიორგი მოისწრაფიშვილმა „დინამო თბილისში“ 71 მატჩში მიიღო მონაწილეობა, გაიტანა 13 გოლი და შეასრულა 14 საგოლე გადაცემა. გარდა ამისა, იჯარით ის „თელავში“ თამაშობდა, ხოლო საქართველოს 21-წლამდე ნაკრებში 12 მატჩში თავი 3 გოლით გამოიჩინა.