„არსენალისა“ და „ფულემის“ თამაში კოკისპირულ წვიმაში ძალიან დრამატული გამოდგა და ეს ადრეულმა გოლმა განაპირობა. უკვე პირველ წუთზე საკას უხეში შეცდომის შემდეგ სტუმრები დაწინაურდნენ. „არსენალი“ მდევრის როლში აღმოჩნდა და შეუტია, თუმცა სტუმრები სახიფათოდ კონტრუტევდნენ.

შესვენების შემდეგ სიტუაცია შეიცვალა. საბოლოოდ, „მეთოფეთა“ ზეწოლა უფრო გამოიკვეთა. მერე იყო სამწუთიანი მონაკვეთი, როცა მასპინძლებმა ორჯერ გაიტანეს, ჯერ საკამ ზუსტად დაარტყა პენალტი, შემდეგ კი ნკეიტამ იყოჩაღა.

ძირითადი დროის დასრულებამდე შვიდი წუთით ადრე, სტუმრები კაცნაკლულნი დარჩნენ. მცველი ბეისი გააძევეს მოედნიდან. თუმცა „ფულემმა“ მაინც მოახერხა ანგარიშის გათანაბრება. 87-ე წუთზე პორტუგალიელმა ჟოაუ პალინამ მატჩის საბოლოო ანგარიში დააფიქსირა - 2:2.

სამი თამაშის შემდეგ „არსენალს“ შვიდი ქულა მოუგროვდა და სატურნირო ცხრილში მეორე ადგილზეა. ოთხქულიანი „ფულემი კი " მეთერთმეტე პოზიციაზე დგას.

„ნოტინგემთან“ შეხვედრა „წითელი ეშმაკებისთვის" კატასტროფულად დაიწყო. მე-4 წუთზე სტუმრები უკვე 0:2 იგებდნენ... ანგარიში ავონიმ გახსნა, ორ წუთში კი „მეტყევეებმა“ მეორე შეაგდეს - თავი ბოლიმ გამოიჩინა.

თუმცა მანკუნიანელები შედარებით სწრაფად მოვიდნენ გონს და მეტოქის ნახევარზე „დასახლდნენ.“ ერიქსენმა გაიტანა ერთი საპასუხო, მერე კაზემირომ გაათანაბრა ანგარიში. ბოლოს კი ფერნანდეშმა ზუსტად დაარტყა პენალტი. საბოლოოდ - 3:2.

ახლა „მანჩესტერს“ სამ სასტარტო თამაშში ექვსი ქულა მოუგროვდა და ცხრილში მეხუთე ადგილზე დგას.

ტურის გვიან მატჩში „ვესტ ჰემმა“ სტუმრად 1:3 დაამარხა „ბრაიტონი,“ 7 ქულა მოაგროვა და სატურნირო ცხრილს სათავეში ჩაუდგა. ამდენივე ქულა აქვთ „ტოტენჰემსა“ და „არსენალსაც,“ მაგრამ „ჩაქუჩები“ ბურთების უკეთესი ბალანსის წყალობით ლიდერობენ

ინგლისი

პრემიერლიგა 2023/24

მე-3 ტური. 26 აგვისტო

არსენალი - ფულემი 2:2

0:1 პერეირა (1), 1:1 საკა (70 პენ), 2:1 ნკეიტა (73), 2:2 პალინია (87)

გაძევება: ბეისი (83) - ფულემი

ბორნმუთი - ტოტენჰემი 0:2

0:1 მედისონი (17), 0:2 კულუშევსკი (63)

ევერტონი - ვულვერჰემპტონი 0:1

0:1 კალაიჯიჩი (87)

მანჩესტერ იუნაიტედი - ნოტინგემ ფორესტი 3:2

0:1 ავონი (2), 0:2 ბოლი (4), 1:2 ერიკსენი (17), 2:2 კაზემირო (52), 3:2 ფერნანდეში (76 პენ)

გაძევება: უორელი (67) - ნოტინგემ ფორესტი

ბრენტფორდი - კრისტალ პალასი 1:1

1:0 შადე (18), 1:1 ანდერსენი (76)

ბრაიტონი - ვესტ ჰემი 1:3

0:1 უორდ-პროუსი (19), 0:2 ბოუენი (58), 0:3 ანტონიო (63), 1:3 გროსი (81)