ხვიჩა კვარაცხელია გამოჯანმრთელდა და მოსამზადებელ ეტაპზე ბოლო ამხანაგურ მატჩში, ლიმასოლის „აპოლონთან“ ითამაშა. მართალია, ქართველმა ფეხბურთელმა უგოლო სერია ისევ ვერ შეწყვიტა, მაგრამ აქტიური იყო და რამდენიმე საგოლე მომენტი ჰქონდა - ორჯერ არაზუსტად დაარტყა.

კვარამ თანაგუნდელებსაც შეუქმნა საგოლე მომენტები და სწორედ მისი აქტიურობით გაიხსნა ანგარიში. მე-60 წუთზე ხვიჩამ მატიას ოლივერა კარგ პოზიციაში დატოვა, რომლის პასით ვიქტორ ოსიმენმა ცარიელ კარში გაიტანა. 65-ე წუთზე ხვიჩა და გუნდის სხვა ლიდერები რუდი გარსიამ შეცვალა. მერე ჯოვანი სიმეონემ მეორეც გაიტანა და ნეაპოლელებმა 2:0 იმარჯვეს.

„ნაპოლიმ“ პრესეზონზე 6 მატჩიდან 4 მოიგო, ორჯერ ფრე ითამაშა. თუმცა, უნდა ითქვას, რომ იტალიის ჩემპიონს განსაკუთრებით ძლიერი მეტოქეები არ ჰყავდა. კვარამ ამ 6 მატჩიდან ოთხში ითამაშა (არც ერთხელ შეუცვლელად) და 1 საგოლე პასი მიითვალა.

აქვე გეტყვით, რომ „ნაპოლი“ სეზონს 19 აგვისტოს, „ფროზინონესთან“ საგარეო მატჩით გახსნის.