გერმანიის ქალაქ მიუნხენში ევრობასკეტ 2025-ის საკვალიფიკაციო ტურნირის წილისყრა გაიმართა, სადაც ევროპის 32 ქვეყნის ნაკრები 8 ჯგუფში გადანაწილდა და ისინი კონტინენტის პირველობის 24 საგზურისვის გააჩაღებს ბრძოლას.

საქართველოს ნაკრები G ჯგუფში მოხვდა, სადაც მისი მეტოქეები სერბეთის, ფინეთისა და დანიის ნაკრებები იქნებიან.

აღსანიშნავია, რომ ფინეთი მომდევნო ევრობასკეტის ერთ-ერთი მასპინძელია, შესაბამისად, შესარჩევ ციკლში ფორმალურად გამოდის, იქ თამაშის უფლება ისედაც განაღდებული აქვს. ამრიგად, საქართველოს ნაკრების ჯგუფიდან ფინალურ ეტაპზე ფინეთის გარდა, კიდევ ორი გუნდი გავა (სერბეთი, საქართველო, დანიას შორის ორი).

გათამაშების ფორმატი და თამაშების ჩატარების თარიღები ცნობილია. როგორც აქამდე, საკვალიფიკაციო ციკლი 3 ფანჯარაზე გადანაწილდება.

პირველი ფანჯარა 2024 წლის 19-დან 27 თებერვლის ჩათვლით გაიმართება და მის ფარგლებში გუნდები 2-2 მატჩს ითამაშებენ. მე-2 ფანჯრის თამაშები 2024 წლის 18:26 ნოემბერს ჩატარდება, ხოლო ბოლო ფანჯარა 2025 წლის 17-25 თებერვალს გაიმართება.

24-დან 4 საგზური დაკავებულია. მათი მფლობელები ევრობასკეტ 2025-ის მასპინძლები – კვიპროსი, ლატვია, ფინეთი და პოლონეთი არიან. ეს ნაკრებები საკვალიფიკაციო ტურნირში მაინც მონაწილეობენ, თუმცა ევრობასკეტზე თამაშის უფლება მოპოვებული აქვთ.