იტალიელმა ჟურნალისტმა პაოლო ბარჯიჯამ 7 Gold-თან ინტერვიუში განაცხადა, რომ მისი შეფასებით, ხვიჩა კვარაცხელია „ნაპოლიდან“ მომდევნო სეზონის შემდეგ წავა. გარდა ამისა, აღნიშნა, რომ ნეაპოლელები კვარას პოტენციურ შემცვლელს უკვე აკვირდებიან.

„ჩემი შეფასებით, ოსიმენი კონტრაქტს არ გაახანგრძლივებს და „ნაპოლიდან“ წავა. სატრანსფერო ბაზარი უცნაურია და სიურპრიზები ხდება, მაგრამ ასე მგონია. კვარაცხელიაზეც იგივე სიტუაციაა, თუმცა ის არა ახლა, არამედ ერთი წლის შემდეგ დატოვებს კლუბს. „ნაპოლი“ უკვე აკვირდება მის შემცვლელს, იესპერ კარლსონს, რომელიც ახლა „აზ ალკმაარში“ თამაშობს“, - განაცხადა ბარჯიჯამ.

შეგახსენებთ, რომ ხვიჩა კვარაცხელიას „ნაპოლისთან“ გრძელვადიანი კონტრაქტი აკავშირებს, რომელიც ძალაში 2027 წლამდეა. იტალიური კლუბი 14 ივლისიდან ახალი სეზონისთვის მზადებას დაიწყებს, ხოლო სერია A-ს პირველ ტურში 19 აგვისტოს, გიორგი კვერნაძის „ფროზინონეს“ ესტუმრება.