გიორგი მიქაუტაძე „იუვენტუსს“ დაუკავშირეს და მის შესახებ იტალიური მედია აქტიურად წერს. ამჯერად გიორგის ვრცელი სტატია Eurosport-მა მიუძღვნა, რომელიც წერს, რომ „იუვეს“ პროფილს გიორგი სრულად შეესაბამება.

თუმცა, იქვე საუბარია იმ ფაქტორებზეც, რამაც შეიძლება მას ტურინში დამკვიდრებაში ხელი შეუშალოს.

„იუვენტუსის“ სეზონი წარუმატებელი იყო: მოსაწყენ თამაშსა და არადამაკმაყოფილებელ შედეგებს შორის, „იუვენტუსი“ ნაცრისფერ მომავალს ხედავს. კაპიტალის მოგების საქმემ და სახელფასო მანევრმა „ბებერი ქალბატონი“ დააჯარიმა, როგორც ქულების, ისე მენტალური სტაბილურობის თვალსაზრისით. თუმცა, ყველაფრის მიუხედავად გადაუდებელია, ყველაფრის განახლება. გიორგი მიქაუტაძის იდეაც ამ მიმართულებით მიდის. ის არის 2000 წელს დაბადებული ფრანკო-ქართველი თავდამსხმელი „მეციდან“, რომელმაც ლიგა 2-ში გაიბრწყინა. მიქაუტაძე მრავალმხრივი მოთამაშეა და შეუძლია, როგორც პირველი, ისე მეორე თავდამსხმელის როლში თამაში. მისი თამაშის სტილი ძალიან ჰგავს ხვიჩა კვარაცხელიას, რომელმაც ჩვენი სერია A მოაჯადოვა. საფრანგეთში ჟან-პიერ პაპენსაც ადარებენ და „ლიონმა“ მასზე უარი თქვა, რადგან ძალიან დაბალი იყო. სამაგიეროდ, მასზე უარი არ თქვა „მეცმა“, რომელმაც გადაწყვიტა მასზე ფსონი გაეკეთებინა.

2020-2022 წლებში „მეცმა“ ის იჯარით ბელგიურ „სერანში“ გაგზავნა. აქ მან აჩვენა არა მხოლოდ გოლის გატანის უნარი, არამედ მეტოქეების სისწრაფეზე მოტყუების თვისებები. წელს იყო „მეცის“ ლიგა 1-ში აღზევების ერთ-ერთი დიდი არქიტექტორი, მისი 23 გოლის წყალობით, რითაც ბომბარდირიც გახდა. „იუვენტუსი“ შესანიშნავი ნახტომი იქნება მის კარიერაში ხარისხობრივად, მაგრამ თავის შანსს ალეგრის გუნდშიც მიიღებს, რადგან „იუვეში“ ძალიან ცოტა შემტევია, რომელსაც რაიმე გარანტირებული აქვს. არეკ მილიკის იჯარის ვადა ამოიწურა, დუშან ვლაჰოვიჩმა მოლოდინი ვერ გაამართლა და რამდენიმე კლუბიცაა დაინტერესებული. როგორც ჩანს, „იუვენტუსის“ ხელმძღვანელობამ თავისი მარგალიტი იპოვა.

მიქაუტაძის პროფილი მშვენივრად ერგება „იუვეს“ საჭიროებებს და გულშემატკივრები კვარაცხელიას მსგავს ტრანსფერზე ოცნებობენ. ის ფაქტი, რომ ისინი ერთმანეთს ჰგვანან, არ ნიშნავს იმას, რომ ერთნაირი გავლენა ექნებათ. სერია A ყველასთვის უცნობი ფაქტორით გამოირჩევა, რადგან ეს არის უკიდურესად ტაქტიკური ლიგა და ამან შეიძლება შეზღუდოს ფეხბურთელების შემოქმედებითი შესაძლებლობები. როგორც წესი, ახალწვეულებს ყოველთვის გარკვეული დრო სჭირდებათ ადაპტაციისთვის, „იუვენტუსში“ კი რეაბილიტაცია ეჩქარებათ. ამან შეიძლება უფრო მეტი წნეხი მოახდინოს პოტენციურ ახალწვეულზე. გარდა ამისა, მაქს ალეგრის ტაქტიკური ხედვა, რომელიც თუ რაღაც მოულოდნელი არ მოხდა, დარჩება „იუვეს“ მწვრთნელად, შესაძლოა, არ შეესაბამებოდეს მიქაუტაძის სათამაშო სტილს. „იუვენტუსის“ თამაში ხშირად უმოქმედოა, განსაკუთრებით შეტევის ფაზაში, ხშირად ქაოტური და ცუდად ორგანიზებული. თუმცა, მიქაუტაძე საინტერესო პროფილია, მაგრამ ჯერ მხოლოდ იდეის დონეზეა და თუ შემდეგ მოლაპარაკებები გაგრძელდება, საჭირო იქნება მისი მოედანზე გამოცდა“, - წერს Eurosport-ი.

შეგახსენებთ, რომ გიორგი მიქაუტაძემ გასულ სეზონში ყველა ტურნირზე 34 მატჩში 27 გოლი გაიტანა. ის 23 გოლით ლიგა 2-ის საუკეთესო ბომბარდირი გახდა და ასევე ლიგა 2-ში სეზონის საუკეთესო ფეხბურთელად დაასახელეს. „მეცი“ ლიგა 1-ში გადავიდა, გიორგის კი ფრანგულ კლუბთან კონტრაქტი 2026 წლამდე აქვს გაფორმებული.