„ინტერის“ პრეზიდენტმა სტივენ ჟანგმა ჩემპიონთა ლიგის ფინალში „მანჩესტერ სიტისთან“ მარცხის (0:1) შემდეგ კომენტარი გააკეთა. როგორც მან განაცხადა, მისმა გუნდმა დაამტკიცა, რომ არავისზე ნაკლები არ არის და არავის ჩამოუვარდება.

„ეს იყო ფინალი, რომელიც სიამაყით ვითამაშეთ. მოგება და წაგება ფეხბურთის ნაწილია, მინდა მაინც მივულოცო ჩემს გუნდს, პერსონალს, ფეხბურთელებს, მწვრთნელს, იმისთვის, რაც გააკეთეს. 100% გაიღეს. ამავდროულად ვულოცავ „სიტის“, მათ შესანიშნავი სეზონი ჰქონდათ. ვამაყობთ, რომ ფინალში გავედით.

ვფიქრობ, მაღალი დონის ფეხბურთელები გვყავს ხარისხით და მენტალიტეტით, ეს ყველამ დაინახა ამ ფინალში, ჩვენ არავის ჩამოუვარდებით. ზაფხულში განსახორციელებელი სამუშაოები უკვე დაწყებულია. ვინც კარგად ითამაშა, ვეცდებით შევინარჩუნოთ და ამას სიამოვნებით გავაკეთებთ. ცხადია, სატრანსფერო კამპანია ერთ დღეში არ იგეგმება. მთავარი იქნება, საუკეთესო ფეხბურთელები შევინარჩუნოთ, რომ ისევ კონკურენტუნარიანები ვიყოთ. დღეს დავამტკიცეთ, რომ ვიმსახურებდით ფინალში თამაშს და ძლიერები ვართ. მატჩის წინ ყველა ამბობდა, რომ უშანსოდ ვიყავით, სანაცვლოდ კი ამ შედეგით ვამაყობთ. ფინალს უნდა ჰყავდეს გამარჯვებული და დამარცხებული, მაგრამ ჩვენ მომავლის გვჯერა, რადგან წელს საფუძველი ჩავდეთ.

ფეხბურთმა რაც მასწავლა, არის ის, რომ გამარჯვებულ გუნდს უნდა ჰყავდეს გამოცდილი და ახალგაზრდა ფეხბურთელების ნაზავი. გვჭირდება მოწიფული მოთამაშეები, მაგრამ ბალანსი საჭიროა. ლუკაკუ? ფეხბურთელმა აჩვენა „ინტერთან“ მისი ძლიერი კავშირი, ის საოცარი ბიჭია. მას „ჩელსისთან“ კონტრაქტი აქვს და ამ საკითხზე უნდა ვისაუბროთ“, - თქვა ჟანგმა.

შეგახსენებთ, რომ „ინტერი“ ჩემპიონთა ლიგის ფინალში 13-წლიანი პაუზის შემდეგ გავიდა. ზოგადად, "ნერაძურისთვის" ეს იყო მეორე ფინალი მას შემდეგ, რაც ტურნირს კონკრეტულად ჩემპიონთა ლიგა ეწოდა (1992 წლიდან).