მსოფლიოს 2022 წლის ჩემპიონატის B ჯგუფის პირველ ტურში უელსისა და აშშ-ს ნაკრებები დაუპირისპირდებიან. ორივე გუნდი მუნდიალზე თამაშს მონატრებულია, განსაკუთრებით ეს ევროპელებზე ითქმის.

უელსს მსოფლიოს ჩემპიონატზე ისტორიაში ერთხელ აქვს ნათამაშები, ისიც შორეულ 1958 წელს, შვედეთში. აშშ-ს ნაკრები ამ მხრივ ბევრად გამოცდილია, თუმცა, 2018 წლის მუნდიალზე ამერიკელები ვერ გავიდნენ. ამრიგად, პლანეტის მთავარ პირველობად 8-წლიანი პაუზის შემდეგ უბრუნდებიან.

სტატისტიკა

აშშ-ს ნაკრები თავის ბოლო ორ ჩემპიონატზე (2010 და 2014) ჯგუფიდან გავიდა. ზოგადად, ამერიკელებმა ბოლო 6 მუნდიალიდან, რომელშიც მონაწილეობა მიიღეს, ოთხჯერ ჯგუფიდან გასვლა მოახერხეს.

აშშ-მ მსოფლიოს ჩემპიონატის ბოლო 10 მატჩიდან მხოლოდ ერთში ვერ გაიტანა გოლი.

უელსის ნაკრებს მსოფლიოს ჩემპიონატზე ერთადერთხელ, 1958 წელს აქვს ნათამაშები და მეოთხედფინალში გავიდა, სადაც ბრაზილიასთან დამარცხდა.

უელსის ნაკრები ევროპის ჩემპიონატზეც მხოლოდ ორჯერ იყო და ორჯერვე პლეი-ოფში ითამაშა. ამრიგად, უელსი დიდ ტურნირზე ჯგუფში არასდროს ჩარჩენილა.

ურთიერთშეხვედრები

აშშ და უელსი აქამდე ერთმანეთს ორჯერ შეხვედრიან, მაგრამ მსოფლიოს ჩემპიონატზე არასდროს. 2020 წლის 12 ნოემბერს, ამ გუნდების ბოლო თამაში უგოლოდ დასრულდა, ხოლო 2003 წლის 26 მაისს, აშშ-მ უელსი 2:0 დაამარცხა.

კრისტიან პულიშიჩი (აშშ-ს ნაკრების ფეხბურთელი): „ვფიქრობ, საკუთარ თავი უნდა წარმოვაჩინოთ. შესაძლოა, ბოლო ათწლეულში ძალიან მაღალ დონეზე არ ვყოფილვართ, მაგრამ ყოველთვის კარგი გუნდი გვყავდა და ვფიქრობ, შეგვიძლია მომდევნო ეტაპზე გასვლა. წარმატებულ მსოფლიოს ჩემპიონატზე ჩვენთვის ბევრი რამის შეცვლა შეუძლია“.

გარეთ ბეილი (უელსის ნაკრების ფეხბურთელი): „მსოფლიოს ჩემპიონატზე თამაში ყველას ოცნებაა და ეს განსაკუთრებული იქნება, რითაც მთელი ერი იამაყებს. ყველაფერს გავაკეთებთ იმისათვის, რომ ჯგუფიდან გავიდეთ და მაქსიმუმს მივაღწიოთ. ამ მაისურისთვის მთელი გულით ვთამაშობთ“.

სავარაუდო შემადგენლობები

არ-რაიანი, „აჰმად ბინ ალი სთედიუმი“

21 ნოემბერი, 23:00 საათი

აშშ (4-3-3): ტერნერი; დესტი, ზიმერმანი, ლონგი, რობინსონი; მუსა, ადამსი, ამკკენი, პულიშიჩი, სარგენტი, აარონსონი

უელსი (3-4-3): ჰენესი; ამპადუ, როდონი, დევისი; რობერტსი, ალენი, რემსი, ნიკო უილიამსი; ბეილი, მური, ჯეიმსი