ქალთა სპრინტში დღეს იამაიკელებს ბადალი არ ჰყავთ, მაგრამ 4X100 მეტრზე ესტაფეტაში ისინი მაინც ოქროს მედლების გარეშე დარჩნენ. ამაში „დამნაშავე“ კი ამერიკული ოთხეულია. სამაგიეროდ, ამერიკელ მამაკაცებს, ამანათის შეფერხებით გადაცემა, ოქროს მედლების დაკარგვად დაუჯდათ. და ჩემპიონები კანადელები გახდნენ.

იამაიკელები ფინალში თავიანთი სუპერ ვარსკვლავების, შერიკა ჯეკსონის, შელი-ენ ფრეიზერ-პრაისის და ელეინ თომას-ერას დაუხმარებლად გავიდნენ. ამათი დამატების შემდეგ, ნახევარფინალიდან მათ კვარტეტს მხოლოდ კემბა ნელსონი შემორჩა.

იამაიკელთაგან გარბენი 200 მეტრზე ჩემპიონმა შერიკა ჯეკსონმა დაამთავრა, მაგრამ მან ვერაფრით შეძლო ამერიკელი ტვანიშა ტერის გასწრება. ტერის გარდა, ამერიკელთა ოქროს კვარტეტში ასევე იყვნენ: ები შტაინერი, მელისა ჯეფერსონი და ჯენა პრანდინი. მათ ფინიში 41.14 წამში გადაკვეთეს და 0.04 წამით ჩამოიტოვეს იამაიკის ოთხეული.

ჩემპიონთა შედეგი, მეხუთე საუკეთესოა 4X100 მეტრზე ესტაფეტის ისტორიაში. და ეს, იუჯინის მსოფლიო ჩემპიონატზე, ამერიკელთა მიერ მოპოვებული მე-10 ოქროს მედალია.

აღსანიშნავია, რომ ამერიკელებმა და იამაიკელებმა, ბოლო რვა მსოფლიო ჩემპიონატზე, 4X100 მეტრზე ესტაფეტაში ოთხ-ოთხი ოქროს მედალი მოიპოვეს, ბოლო 10 ოლიმპიადაზე კი, ორივემ ერთად, ჯამში 8 ოქროს მედალი დაისაკუთრა.

ბრინჯაოს მედლებს, ყველასთვის მოულოდნელად, გერმანელები დაეუფლნენ. მათ წარმტებას ხელი შეუწყო იმან, რომ ბრიტანეთის გუნდს, ტრავმის გამო, მათი ლიდერი, დინა აშერ-სმითი გამოაკლდა.

მამაკაცების ესტაფეტაში, ფავორიტი ამერიკის ოთხეული იყო, რომელიც იუჯინში მოქმედი ჩემპიონის სტატუსით ასპარეზობდა. მაგრამ ელაიჯა ჰოლმა და მერვინ ბრეისიმ ამანათის გადაცემისას დრო დაკარგეს, რაზეც ბევრი დრო დაიკარგა. ამასთან, კანადელთა დამამთავრებელმა, 200 მეტრზე სპრინტში ოლიმპიურმა ჩემპიონმა ანდრე დე გრასმა შესანიშნავად იასპარეზა, ამერიკელ მეტოქეს (ბრეისის) გადაასწრო და თავის ქვეყანას უპრესტიჟულესი შეჯიბრი მოაგებინა. ბრინჯაოს მედალს ბრიტანეთის ოთხეული დაეუფლა. ფინიშთან ჩემპიონებმა ამერიკელებს 0.07 წამით მიასწრეს.

ჩემპიონთა ოთხეულში შედიოდნენ: ანდრე დე გრასი, ბრენდონ როდნი, აარონ ბრაუნი და ჯერონ ბლეიკი. მათ ასპარეზობა 37.48 წამში დაასრულეს. აღსანიშნავია, რომ დე გრასს ტრავმის და სხვა მიზეზების გამო, ბევრი დრო გაუცდა და მსოფლიო ჩემპიონატს საუკეთესო ფორმაში ვერ შეხვდა. ის 200 მეტრზე სპრინტს ადრევე გამოეთიშა და ვერც 100 მეტრზე სპრინტის ფინალში გავიდა. სამაგიეროდ, დიდი წვლილი შეიტანა ესტაფეტაში კანადელთა პირველ გამარჯვებაში 1997 წლის შემდეგ.

მამაკაცთა სამხტომში, გამარჯვება პორტუგალიელმა ოლიმპიურმა ჩემპიონმა, პედრო პიკარდომ მოიპოვა, ვინც 17.95 მეტრზე გადახტა. და უკან მოიტოვა ბურკინა ფასოელი ჰიუგო ფაბრის ზანგო. ბრინჯაოს მედალი ჩინელმა ჟუ იამინმა მოიპოვა, ვინც ტოკიოში ოლიმპიურ ვერცხლს დაეუფლა.

29 წლის პიკარდოს მსოფლიო ჩემპიონატებზე ორი ვერცხლის მედალი კუბის სახელით აქვს მოპოვებული. მაგრამ შემდეგ პორტუგალიის პასპორტი აიღო და ოლიმპიური ჩემპიონიც თავისი ახალი ქვეყნის დროშით გახდა. მან საჩემპიონო ნახტომი, რომელიც ამ სეზონის საუკეთესოა მსოფლიოში, პირველივე ცდაზე შეასრულა.

მამაკაცთა შორის 800 მეტრზე სირბილში, ოქროს მედალს კენიელი ოლიმპიური ჩემპიონი, ემანუელ კორირი დაეუფლა. მეორე ადგილი მოულოდნელად, ალჟირელმა ჯამელ სეჯაიტიმ დაიკავა, ბრინჯაო კი კანადელ მარკო აროპს ერგო.

კორირს ამ სეზონში თითქმის არსად უასპარეზია, მაგრამ ფორმაში წინასწარ გარბენებში მონაწილეობისას შევიდა. ფინალში პირველი 600 მეტრი ჯგუფთან ერთად ირბინა, მერე კი თავის სტილში, საგრძნობლად გაზარდა ტემპი და ფინიშის ხაზიც პირველმა გადაკვეთა.

ათჭიდში ფავორიტი იყო კანადელი ოლიმპიური ჩემპიონი დამიან ვარნერი. ის ოთხი სახეობის შემდეგ, ლიდერობდა კიდეც, მაგრამ 400 მეტრზე გარბენისას ტრავმა მიიღო და შეჯიბრს გამოეთიშა. ლიდრობა კი პუერტო რიკოელი აიდენ ოუენს-დელერმის ხელშ გადავიდა. ათჭიდელები ასპარეზობას ჩემპიონატის ბოლო დღეს, კვირას დაასრულებენ.

მამაკაცთა შორის შუბის ტყორცნაში, გამარჯვება გრენადელმა ანდერსონ პიტერსმა მოიპოვა, ვინც ვერცხლის ამარა დატოვა ოლიმპიური ჩემპიონი ინდოეთიდან, ნეერაჟ ჩოპრა. ბრინჯაოს მედალს ჩეხი იაკუბ ვადლეიხი დაეუფლა.

პეტერსმა შუბი 90.54 მეტრზე გაისროლა და მსოფლიო ჩემპიონის ტიტული შეინარჩუნა. ქარიან ამინდში, ის ერთადერთი მონაწილე იყო, ვინც შუბი 90 მეტრს გადააცილა. თანაც, ეს სამჯერ გააკეთა. ჩოპრას საუკეთესო შედეგი იყო 88.13 მეტრი. მას მხოლოდ 4 სანტიმეტრით ჩამორჩა ვადლეიხი, ვინც ტოკიოს ოლიმპიადაზე ვერცხლს დაეუფლა. აღსანიშნავია, რომ ჩოპრამ ტოკიოში ოლიმპიური ოქრო, შუბის 87.58 მეტრზე გასროლით მოიპოვა.

ქალთა შორის 5 000 მეტრზე სირბილში, ჩემპიონი ეთიოპიელი გუდაფ ცეგაი გახდა. მსოფლიო რეკორდსმენი, ეთიოპიელი ლეტესენბეტ გიდი და ოლიმპიური ჩემპიონი, ჰოლანდიელი სიფან ჰასანი კვარცხლბეკის მიღმა დარჩნენ.

ჰასანმა თავისი საფირმო შეტევა, ფინიშამდე 200 მეტრით ადრე დაიწყო, მაგრამ ძალა არ ეყო და მალე ჩამორჩა. ცეგაი (ტოკიოში ბრინჯაოს მედალი აიღო) და გიდი ბოლო წრემდე ენაცვლებოდნენ ლიდერის პოზიციაზე, მაგრამ გიდი, ვინც მსოფლიო ჩემპიონი 10 000 მეტრზეა, ბოლოს გადაიღალა და ჩამორჩა.

ამგვარად, ცეგაიმ 1 500 მეტრზე მოპოვებულ ვერცხლის მედალს, 5 000 მეტრზე მოგებული ოქრო დაუმატა. ვერცხლის მედალი კენიელმა ბეატრის ჩებეტმა მოიპოვა, ბრინჯაოს მედალი კი ეთიოპიელ დავიტ სეიაუმს ერგო.