ინგლისური „ლივერპულის“ მთავარმა მწვრთნელმა იურგენ კლოპმა „ვილიარეალთან“ ჩემპიონთა ლიგის საპასუხო ნახევარფინალური მატჩის წინ კომენტარი გააკეთა. როგორც გერმანელმა სპეციალისტმა აღნიშნა, ადვილ თამაშს არ ელოდებიან და ესპანეთში გამარჯვებისთვის ითამაშებენ.

„მზად უნდა ვიყოთ ტოპთამაშისთვის, რადგან ისინი დიდი წნეხის ქვეშ მოგვაქცევენ. შეეცდებიან იმაზე კარგად ითამაშონ, ვიდრე პირველ შეხვედრაში. უნაი შეეცდება ჩვენს სტილს თავისი ფეხბურთელი მოარგოს და ნამდვილად საინტერესო მატჩი იქნება.

არასოდეს იცი, გექნება თუ არა ოდესმე ნახევარფინალში გასვლის შანსი, ამიტომ, უმჯობესია ამ სიტუაციას ფრთხილად მოეპყრო და მზად იყო. ძალიან გვინდოდა აქ ყოფნა და გვინდა ფინალში გასვლა. თუმცა, თუ „ვილიარეალი“ გავა, ჩვენ მივულოცავთ. ჩემპიონთა ლიგის ნახევარფინალში ადვილ თამაშს არასდროს ველოდებით, არც ეს მატჩი იქნება გამონაკლისი. ჩვენ მოსაგებად ვითამაშებთ. შესაძლოა, ფინალი უფრო მნიშვნელოვანია, მაგრამ ამ დროისთვის ყველაზე მნიშვნელოვანი ხვალინდელი შეხვედრაა“, - თქვა კლოპმა.

შეგახსენებთ, რომ „ვილიარეალისა“ და „ლივერპულის“ მატჩი 3 მაისს, თბილისის დროით 23:00 საათზე გაიმართება.