ყაზახმა მოკრივე გენადი გოლოვკინმა, იაპონიის საიტამაში, ადგილობრივი რიოტა მურატა მეცხრე რაუნდში, ნოკაუტით დაამარცხა და საშუალო წონაში (72.5 კგ) ორი პრესტიჟული გაერთიანების - IBF-ის და WBA-ის ტიტულები გააერთიანა.

40 წლის გოლოვკინი (42-1-1, 37 ნოკაუტი) არ მალავს, რომ შემდეგი ბრძოლის გამართვა, მექსიკელ საულ „კანელო“ ალვარესთან სურს, ვისაც 7 მაისს შეხვედრა აქვს WBA-ის ყირგიზ ჩემპიონ დმიტრი ბივოლთან. ოღონდ, ეს ბრძოლა ქვემძიმე წონაში (79 კგ) ჩატარდება.

ბრძოლის დასაწყისში, მცირე უპირატესობა მურატას (16-3, 13 ნოკაუტი) ჰქონდა, ვინც უფრო აგრესიული იყო. გოლოვკინს ხშირად უკან დახევა უწევდა, რაც მის კარიერაში ხშირად არ ხდება. მეექვსე რაუნდში ყაზახის მარჯვენა მეტოქეს სახეში მოხვდა. მურატას პირიდან დამცავი კაპი გადმოუვარდა. ტრავმა არ მიუღია, მაგრამ აქედან მოყოლებული, ინიციატივას გოლოვკინი დაეუფლა.

მურატა ხელების ჩამოშვებას არ აპირებდა და მან რამდენიმე ძლიერი დარტყმა შეასრულა, თუმცა გოლოვკინმა ეს შეტევები იოლად გადაიტანა. მეცხრე რაუნდის დასაწყისშივე, ყაზახმა მარჯვენით პირდაპირი ძლიერი დარტყმით, რიტმიდან ამოაგდო მეტოქე. აქ მან იგრძნო, რომ ბრძოლის დასრულება შეეძლო და რამდენიმე ზუსტი დარტყმაც განახორციელა. მურატა მედგრად დაუხვდა, მაგრამ ერთმა ძლიერმა დარტყმამ მაინც მოცელა. ამას მისი კუთხიდან პირსახოცის გადმოგდება მოჰყვა და ბრძოლაც ამით დასრულდა.

რაც შეეხება ალვარესთა მესამე ბრძოლას. გოლოვკინთან მესამედ შეხვედრა მექსიკელსაც სურს. პირველი ორიდან 2017 წელს ფრე დაფიქსირდა, 2018 წელს კი ქულებით ალვარესმა მოიგო.