საქართველოს ეროვნულ ლიგაში „დინამო თბილისმა“ გორის „დილას“ უმასპინძლა და 2:1 დაამარცხა. ეს იყო მეოთხე ტურის გამოტოვებული მატჩი, რომელიც თოვლის გამო მაშინ გადაიდო.

„დინამომ“ თამაში ძალიან კარგად დაიწყო და მეორე წუთზე დმიტრი ანტილევსკის გოლით დაწინაურდა. ტაიმის ბოლოს კახა ცხადაძის გუნდის უპირატესობა გიორგი პაპავამ საჯარიმო დარტყმით გაზარდა და მასპინძლებმა კომფორტული უპირატესობა მოიპოვეს. მეორე ტაიმში გორელებმა ვაგნერ გონსალვეშის გოლით სხვაობა შეამცირეს, მაგრამ მეტის გაკეთება ვეღარ მოახერხეს და მარცხი განიცადეს.

„დინამო თბილისმა“ 12 ქულა დააგროვა და სატურნირო ცხრილში სწორედ გორის „დილას“ დაეწია, ხოლო ლიდერ „დინამო ბათუმს“ ქულით ჩამორჩება. უნდა აღინიშნოს, რომ ბათუმელებს თბილისელებთან შედარებით თამაშით მეტი აქვთ ჩატარებული.

მომდევნო ტურში „დინამო თბილისი“ „თელავს“ დაუპირისპირდება, ხოლო გორის „დილა“ „ლოკომოტივს“ ესტუმრება.

„დინამო თბილისი“ – „დილა“ 2:1 (2:0)

გოლები: 1:0 ანტილევსკი (2), 2:0 პაპავა (41), 2:1 ვაგნერი (63)