ბაჰრეინის საჰირის ტრეკზე, ფორმულა 1-ის 2022 წლის სეზონი გაიხსნა. ბაჰრეინის დიდი პრიზის საკვალიფიკაციო რბოლა „ფერარის“ შარლ ლეკლერის გამარჯვებით დასრულდა. მან 0.123 წამით აჯობა მსოფლიოს მოქმედ ჩემპიონ მაქს ფერსტაპენს, რომელმაც თავის მხრივ, მხოლოდ 0.006 წამით ჩამოიტოვა ლეკლერის თანაგუნდელი კარლოს საინს უმცროსი.
„წამის დაახლოებით მეათედი მოსახვევში დავკარგე და ამან პოული დამაკარგვინა. მაგრამ ეს პირველი რბოლაა და მთავარი ის არის, რომ კონკურენტუნარიანები ვართ“, - განაცხადა ფერსტაპენმა.
საინტერესოა, რომ 2019 წელს, ლეკლერმა „ფერარის“ მანქანით პირველივე ასპარეზობისას, სწორედ ბაჰრეინში მოიპოვა პოულ პოზიცია. დღეს მოპოვებული პოული, 24 წლის მონაკოელისთვის კარიერაში მეათეა.
„კარგი შეგრძნებაა. ბოო ორი სეზონი რთული იყო ჩვენი გუნდისთვის. იმედი გვქონდა, რომ რეგლამენტის შეცვლა, მოწინავეთა შორის დაბრუნების შესაძლებლობას მოგვცემდა“, - განაცხადა ლეკლერმა.
სტარტზე მეოთხე პოზიციას დაიკავებს ფერსტაპენის თანაგუნდელი სერხიო პერესი, მსოფლიოს შვიდგზის ჩემპიონი ლუის ჰამილტონი კი სტარტს მესამე რიგიდან (მე-5 პოზიციიდან) აიღებს. ამის მიუხედავად, ის შედეგით კმაყოფილი დარჩა. ბრიტანელი ჯერ კიდევ ტესტების შემდეგ ამბობდა, რომ პირველ რბოლებში მოგების იმედი არ ექნებოდა.
მესამე რიგში ჰამილტონის გვერდზე დადგება მისი ყოფილი თანაგუნდელი ვალტერი ბოტასი. კიდევ ერთი მოულოდნელობაა ათეულში კევინ მაგნუსენის მოხვედრა. დანიელიც და ფინელიც „ფერარის“ ძრავებით აღჭურვილი მანქანებით ასპარეზობენ და როგორც ჩანს, სწორედ ძრავების დამსახურებაა მათი და საკუთრივ „ფერარის“ პილოტების წარმატება.
ბაჰრეინის დიდი პრიზი
კვალიფიკაცია
- შარლ ლეკლერი (მონაკო, ფერარი) 1'30.558
- მაქს ფერსტაპენი (ჰოლანდია, რედ ბული) 0.123
- კარლოს საინსი (ესპანეთი, ფერარი) 0.129
- სერხიო პერესი (მექსიკა, რედ ბული) 0.363
- ლუის ჰამილტონი (ბრიტანეთი, მერსედესი) 0.680
- ვალტერი ბოტასი (ფინეთი, ალფა რომეო) 1.002
- კევინ მაგნუსენი (დანია, ჰაასი) 1.250
- ფერნანდო ალონსო (ესპანეთი, ალპინი) 1.637
- ჯორჯ რასელი (ბრიტანეთი, მერსედესი) 1.658
- პიერ გასლი (საფრანგეთი, ალფატაური) 1.780
- ესტებან ოკონი (საფრანგეთი, ალპინი) 1.224
- მიკ შუმახერი (გერმანია, ჰაასი) 1.440
- ლანდო ნორისი (ბრიტანეთი, მაკლარენი) 1.450
- ალექს ელბონი (ტაილანდი, უილიამსი) 2.106
- გუანიუ ჟოუ (ჩინეთი, ალფა რომეო) 2.985
- იუკი ცუნოდა (იაპონია, ალფატაური) 2.192
- ნიკო ჰულკენბერგი (გერმანია, ასტონ მარტინი) 2.219
- დანიელ რიკარდო (ავსტრალია, მაკლარენი) 2.387
- ლანს სტროლი (კანადა, ასტონ მარტინი) 2.474
- ნიკოლას ლატიფი (კანადა, უილიამსი) 3.076
