ტურინის „იუვენტუსის“ ნახევარმცველი დენის ზაკარია ერთი თვე ვერ ითამაშებს. ფეხბურთელს სამედიცინო შემოწმება ჩაუტარდა და დაზიანება საკმაოდ სერიოზული გამოდგა.

შვეიცარიელი მომდევნო ერთი თვის განმავლობაში ვერ გავა მინდორზე, რაც ნიშნავს, რომ 5 მატჩი გაუცდება, მათ შორის, ჩემპიონთა ლიგის საპასუხო მერვედფინალი „ვილიარეალთან“ და „იუვეს“ აპრილში დაუბრუნდება. დენისს ბარძაყის ტრავმა აღენიშნება.

„იუვენტუსს“ მარტში 5 მატჩი ელოდება და მასიმილიანო ალეგრის განკარგულებაში მხოლოდ 3 ნახევარმცველია, არტური, მანუელ ლოკატელი და ადრიენ რაბიო, რადგან ვესტონ მაკკენიც ტრავმირებულია და 2 თვე იუქმებს.

აღსანიშნავია, რომ "იუვეს" ლაზარეთში ამჟამად 9 ფეხბურთელია და მეკარეებს თუ არ ჩავთვლით პირველი გუნდის შემადგენლობიდან ალეგრის განკარგილებაში დღეისთვის მხოლოდ 11 მოთამაშეა. აქვე გეტყვით, რომ დენის ზაკარია "ბებერმა ქალბატონმა" იანვარში დაიმატა და შვეიცარიელმა ოთხ შეხვედრაში 1 გოლი გაიტანა.