საქართველოს კრისტალბეთ ეროვნული ლიგის პირველი ტურის ცენტრალური მატჩი „დინამო თბილისსა“ და ქუთაისის „ტორპედოს“ შორის გაიმართა.

„ქართული დერბი“ მასპინძელთა გამარჯვებით დასრულდა და კახა ცხადაძის გუნდის 3 ქულის მოპოვება არ გასჭირვებია. თბილისელებმა ანგარიში 29-ე წუთზე გახსნეს, როცა კარგი კომბინაცია გაითამაშეს - ოსეი ბარნსის დარტყმა ძელს მოხვდა, ხოლო დამატებაზე ყველას გიორგი მოისწრაფიშვილმა დაასწრო და თავისიანები დააწინაურა.

„დინამოს“ 2 წუთი დასჭირდა იმისთვის, რომ უპირატესობა გაეზარდა. ამჯერად იმერელთა კარი სტანისლავ ბილენკიმ დალაშქრა და საქართველოს ჩემპიონატში სადებიუტო გოლი გაიტანა. ცხადაძის შეგირდებმა მეორე ნახევარში კიდევ ორჯერ გაიტანეს - ჯერ საიმონ ბენიომ შეაგდო, ბოლო წუთზე კი შორი მანძილიდან უსმანე კამარამ ეფექტური გოლი გაიტანა და საბოლოო ანგარიშის დაფიქსირა - 4:0

ასე რომ, „დინამო თბილისმა“ სეზონი კარგად დაიწყო, „ტორპედომ“ - ცუდად. აღსანიშნავია, რომ მატჩის წინ ორივე გუნდის ფეხბურთელებმა უკრაინას მხარდაჭერა გამოუცხადეს.

მეორე ტურში ცხადაძის გუნდი 4 მარტს დინამო ბათუმს ესტუმრება, ხოლო გია ცეცაძის შეგირდები იმავე დღეს გორის „დილას“ უმასპინძლებენ.

„დინამო თბილისი“ – „ტორპედო“ 4:0 (2:0)

გოლები: 1:0 მოისწრაფიშვილი (29), 2:0 ბილენკი (31), 3:0 ბენიო (65), 4:0 კამარა (90)