ესპანეთის თასის ნახევარფინალში გიორგი შერმადინის „ლენოვო ტენერიფე“ მადრიდის „რეალთან“ დამარცხდა და ფინალს მიღმა დარჩა. „სამეფო კლუბმა“ მეტოქეს აშკარად აჯობა, ოთხივე პერიოდი მოუგო და გამარჯვება არ გასჭირვებია - 94:74.

შერმადინმა 14:54 წუთში 14 ქულა და 2 მოხსნა მიითვალა. ქართველმა ცენტრმა 6-დან 5 ორქულიანი და 4-დან 4 საჯარიმო ჩააგდო, მისი მარგი ქმედების კოეფიციენტი კი 15-ს გაუტოლდა, რაც კანარიელთა რიგებში საუკეთესო შედეგი იყო, ისევე როგორც ქულებით თანაგუნდელებში ყველაზე შედეგიანი გახლდათ.

„ლენოვო ტენერიფე“ თასის გათამაშებას გამოეთიშა და მომდევნო მატჩს 6 მარტს, ლიგა ენდესაში „ობრადოიროსთან“ ჩაატარებს, შერმადინი კი ახლა თბილისში, საქართველოს ნაკრებს შეუერთდება.