საქართველოს საუკეთესო ჩოგბურთელს, ნიკოლოზ ბასილაშვილის დოჰას ტურნირზე ტიტულის დასაცავად ერთი ნაბიჯი დააკლდა. 29 წლის ქართველმა, რომელმაც ეს ტურნირი შარშან მოიგო, ამჯერად ფინალში წააგო.

ბასილაშვილი ATP-ს რეიტინგის მე-16 ნომერს და ტურნირზე მეორე ნომრად განთესილ რობერტო ბაუტისტა-აგუტს შეხვდა და ესპანელმა ორ სეტში, 6:3, 6:4 მოიგო. შეხვედრა საათსა და 26 წუთის განმავლობაში მიმდინარეობდა.

ნიკოლოზმა თამაში კარგად დაიწყო და პირველ სეტში ბრეიკი გაახერხა, რის შედეგადაც 3:1 დაწინაურდა, მაგრამ შემდეგ ზედიზედ 5 გეიმი წააგო და სეტიც დათმო (3:6). ქართველისთვის მეორე სეტსაც იგივე სცენარი ჰქონდა: ზედიზედ 3 გეიმი მოიგო და 3:0 დაწინაურდა, მაგრამ უპირატესობა ვერ შეინარჩუნა და მეორე სეტი 4:6 წააგო, შესაბამისად, ფინალში მარცხი განიცადა. ბასილაშვილმა 8 ეისი შეასრულა და 3 ორმაგი შეცდომა დაუშვა, ხოლო ესპანელს არც ეისი ჰქონია და არც ორმაგი შეცდომა დაუშვია.

შეგახსენებთ, რომ დოჰას ტურნირამდე ბასილაშვილს მოუგებელი სერია ჰქონდა, რომელიც სათავეს გასული წლის ოქტომბრიდან იღებდა. მან კარიერაში მე-6 ტიტული ვერ მოიგო, თუმცა, დოჰას ტურნირის ფინალში ზედიზედ მეორედ გასვლაც დადებითი შედეგია.