ლონდონის „ტოტენჰემმა“ ზამთრის სატრანსფერო პერიოდში ორი ფეხბურთელი დაიმატა და ორივე „იუვენტუსიდან“.

დეიან კულუშევსკი „დეზებს“ 18-თვიანი იჯარით შეუერთდა (10 მილიონ ევროდ), ხოლო მისი გამოსყიდვა კლუბს დამატებით 25 მილიონ ევროდ შეეძლება. მეორე ახალწვეული როდრიგო ბენტანკურია - ურუგვაელი ფეხბურთელი „დეზებმა“ სრულფასოვანი კონტრაქტით დაიმატეს და გუნდში 2026 წლის ზაფხულამდე დარჩება. ბენტანკურის ტრანსფერი ანტონიო კონტეს გუნდს 19 მილიონი ევრო და პლუს 6 მილიონი ევროს ბონუსი დაუჯდა.

დეიან კულუშევსკი „იუვენტუსში“ 2020 წლიდან თამაშობდა და წელიწადნახევარში მან 74 თამაშში 9 გოლი გაიტანა და 10 საგოლე პასი გააკეთა.

რაც შეეხება ბენტანკურს, ის იტალიურმა გრანდმა 2017 წელს „ბოკა ხუნიორსიდან“ დაიმატა და 181 თამაშში თავი 3 გოლით და 17 შედეგიანი გადაცემით გამოიჩინა.