გორის „დილას“ ნახევარმცველმა ფრანცისკო მადინგამ აფრიკის ეროვნებათა თასზე შესანიშნავი თამაში ჩაატარა. მალავის ნაკრებმა მისი დიდი დახმარებით ზიმბაბვეს ნაკრებს უმნიშვნელოვანესი თამაში მოიგო.

თავიდან ზიმბაბვე დაწინაურდა, მაგრამ 43-ე წუთზე მადინგამ მარცხენა ფლანგიდან იდეალური, უზუსტესი და ბრწყინვალე პასი გაუკეთა მაგადინიო მანგოს, რომელმაც ერთი შეხებით გაიტანა და გაათანაბრა. ამრიგად, მადინგამ საგოლე პასი ჩაიწერა აქტივში.

58-ე წუთზე კი მეორე გოლშიც უდიდესი წვლილი მიუძღვის, რომელიც ისევ მანგომ შეაგდო და საბოლოო ანგარიში დააფიქსირა - 2:1. შეიძლება ითქვას, რომ მადინგამ ორი საგოლე პასი მიითვალა, მაგრამ ოფიციალურ ოქმში მეორე გოლის ასისტს არ უთვლიან, შესაძლოა ბურთს მცველიც შეეხო და ამიტომ. „დილას“ ფეხბურთელი 84-ე წუთზე შეცვალეს. გავიხსენოთ, რომ პირველ ტურში გვინეასთან წაგებულ შეხვედრაში (0:1) შეუცვლელად ითამაშა. მან დუბლის ავტორ მანგოს შემდეგ ყველაზე მაღალი შეფასებაც დაიმსახურა.

21 წლის მადინგა „დილაში“ 2020 წლიდან თამაშობს და გასულ სეზონში მან კრისტალბეთ ეროვნულ ლიგაში 23 თამაშში 2 გოლი გაიტანა.

მალავის ნაკრები B ჯგუფში ორი ტურის შემდეგ 3 ქულით მესამე ადგილზეა და ბოლო ტურში 18 იანვარს, სენეგალის ნაკრებს შეხვდება. აღსანიშნავია, რომ ჯგუფიდან გასვლის შანსი მესამეადგილოსნებსაც აქვთ და მალავიც რეალურ შანსს ინარჩუნებს, რომ პლეი-ოფში მოხვდეს.