ნორვეგიელი დიდოსტატი მაგნუს კარლსენი მსოფლიოს ჩემპიონი ზედიზედ მეხუთედ გახდა და ტიტულის დაცვა მეოთხედ მოახერხა.

დუბაიში გამართულ მსოფლიოს ჩემპიონატის ფინალის მე-11 შეხვედრა გადამწყვეტი გამოდგა, რომელშიც კარლსენმა რუსი იან ნეპომნიაშჩი დაამარცხა და საერთო ანგარიში 7.5:3.5 გახდა, რითაც ნორვეგიელმა ტიტული ვადაზე ადრე გაინაღდა, რადგან დარჩენილ სამ მატჩში რუსს სამივე რომც მოეგო, ეს მაინც არ ჰყოფნიდა.

11 პარტიიდან საწყისი 5 ყაიმით დასრულდა, ისევე, როგორც მეშვიდე და მეათე პარტიები, ხოლო მეექვსე, მერვე, მეცხრე და მე-11 პარტიები კარლსენმა მოიგო და მსოფლიოს ჩემპიონი კიდევ ერთხელ ისე გახდა, რომ პარტიაც არ წაუგია.

„დიდი მადლობა ყველას მოლოცვისთვის. არ ველოდი, რომ ასე მალე დასრულდებოდა, მაგრამ მე მხოლოდ პროფესიონალურად ვასრულებდი ჩემს საქმეს. არაფერს ვნანობ. ზედიზედ 5 ყაიმის შემდეგ სხვა შანსი არ მქონდა, თუმცა, რა თქმა უნდა, არავინ ელოდა იმას, რაც მოხდა. იანმა ვერ აჩვენა თავისი საუკეთესო თამაში, რაც ყველასთვის სამწუხაროა, მაგრამ ხანდახან ეს ხდება“, - თქვა კარლსენმა გამარჯვების შემდეგ.

მაგნუს კარლსენი 5-გზის მსოფლიოს ჩემპიონობით ვიშვანათან ანანდს და მიხაილ ბოტვიკინს გაუტოლდა, ხოლო მას მხოლოდ ანატოლი კარპოვი, გარი გასპაროვი და ემანუელ ლასკერი უსწრებენ, რომელთაც ეს ტიტული ექვსჯერ აქვთ მოგებული.