„პარი სენ ჟერმენის“ სპორტულმა დირექტორმა ლეონარდომ უარყო ინფორმაცია იმის შესახებ, რომ მოლაპარაკებებს ზინედინ ზიდანთან აწარმოებენ. როგორც ბრაზილიელმა მენეჯერმა აღნიშნა, მაურისიო პოჩეტინოს გუნდის დატოვება არ სურს და კლუბს ფრანგ მწვრთნელთან კონტაქტი არ ჰქონია.
„არ გვინდა, რომ პოჩეტინო წავიდეს. მას არასდროს მოუთხოვია წასვლა და მის გამო არცერთი კლუბი არ დაგვკავშირებია. ზიდანი? დიდ პატივს ვცემთ მას, იმას, რაც მან გააკეთა, როგორც ფეხბურთელმა და მწვრთნელმა, მაგრამ შემიძლია ნათლად ვთქვა: არანირი კონტაქტი და არც შეხვედრა მასთან არ გვქონია“, - განაცხადა ლეონარდომ.
შეგახსენებთ, ზინედინ ზიდანთან მოლაპარაკებების დაწყებისა და შეხვედრის შესახებ ინფორმაცია Le Parisien-მა გაავრცელა, ხოლო შემდეგ ტვიტერში პსჟ-ს მფლობელების ოჯახის წევრმა ხალიფა ალ ტანიმ დაწერა, რომ ზიდანმა კონტრაქტიც კი გააფორმა. ეს, ის ადამიანია, რომელმაც თავის დროზე ლიონელ მესის ტრანსფერი პირველმა დაადასტურა. თუმცა, ფრანგი სპეციალისტის შემთხვევაში ლეონარდომ ცნობა უარყო, ყოველშემთხვევაში ამ ეტაპზე ასეთი ვითარებაა.
