„ბარსელონაში“ ჩავის სამწვრთნელო დებიუტი წარმატებული გამოდგა. ლა ლიგის მე-14 ტურში „ბარსამ“ დერბიში „ესპანიოლს“ უმასპინძლა და მძიმე ბრძოლაში, მაგრამ მაინც დაამარცხა და ჩავიმ კარგად დაიწყო.

ბარსელონური დერბის ბედი მემფის დეპაის გოლმა გადაწყვიტა, რომელმაც თავი 48-ე წუთზე პენალტით გამოიჩინა და ეს შეხვედრის ერთადერთი გოლი გამოდგა. „ესპანიოლს“ უფრო მეტი საგოლე მომენტი ჰქონდა და წაგებას ალბათ არც იმსახურებდა, მაგრამ განსაკუთრებით მატჩის დასკვნით ნაწილში ბევრი რეალური შანსი გაანიავა და ბუნებრივია ამის გამო დაისაჯა.

„ბარსელონამ“ ამ გამარჯვებით 20 ქულა დააგროვა და მეექვსე ადგილამდე აღზევდა. აღსანიშნავია, რომ კატალონელებმა ოთხმატჩიანი მოუგებელი სერია შეწყვიტეს და ხასიათი გამოიკეთეს.

ცხადია, „ბარსელონას“ თამაშის ხარისხი საუკეთესო არ ყოფილა, მაგრამ ჩავის ამისთვის დრო აუცილებლად ექნება, ახლა მნიშვნელოვანი მხოლოდ შედეგი იყო, რასაც მისმა გუნდმა მიაღწია.