„პარი სენ-ჟერმენის“ ყოფილმა ნახევარმცველმა, ჟერომ როტენმა, გუნდის მთავარი მწვრთნელი, მაურისიო პოჩეტინო, ფრანგული ლიგა 1-ის „ლიონთან“ მატჩში (2:1) ლიონელ მესის შეცვლისთვის გააკრიტიკა.

„ყველამ დავინახეთ, მესის მინდვრიდან გასვლა არ უნდოდა. პოჩეტინომ კი ის შეცვალა. ვფიქრობ, ეს დიდი შეცდომა იყო, გამიკვირდა. საერთოდ, კლუბში მოსვლიდანვე სხვაგვარად ექცეოდა მთავარვარსკვლავებს. ნეიმარს და მბაპეს ცუდი თამაშის შემთხვევაშიც არ ცვლიდა.

თავისი სტატუსით მესი გაცილებით დიდია ნეიმარ-მბაპეზე. ჩვენ ხომ შესაძლოა, პლანეტის ყველა დროის საუკეთესო ფეხბურთელზე ვსაუბრობთ. ამიტომ, როცა მესი გუნდში გყავთ, ისე უნდა მოექცეთ, როგორც მსოფლიოში საუკეთესოს. მით უმეტეს, ახალი გზის დასაწყისში.

ვერ გეტყვით, რისი თქმა უნდოდა პოჩეტონოს ამ გადაწყვეტილებით. შეიძლება ყველას უჩვენა: აქ მთავარი მე ვარო. სიგიჟეა ეს ყველაფერი.“ - ციტირებს როტენის სიტყვებს RMC Sport.

შეგახსენებთ, რომ ამ მატჩში, შეცვლისას, მესიმ პოჩეტინოს ხელი არ ჩამოართვა.